ՍՏԵՓԱՆԱԿԵՐՏ, օգոստոսի 13, ԱՐՑԱԽՊՐԵՍ: Ֆիլմի սյուժեն հետևյալն է՝ գերմանացի լրագրող 50-ամյա Ռոբերտ Ստենվալը 2016 թվականին վերադառնում է Արցախ՝ այս անգամ էլ լուսաբանելու քսաներկու տարվա ընդմիջումից հետո վերսկսված ապրիլյան պատերազմը։ Լրագրողական հետաքննության ընթացքում նա ծանոթանում է 35-ամյա օպերային երգչուհի Սոֆիա Մարտիրոսյանի հետ: Ռոբերտի և Սոֆիայի հաճախակի հանդիպումների արդյունքում փոխադարձ սեր է ծնվում: Հետո պիտի պարզվի, որ Սոֆիան անհայտ կորած ֆոտոլրագրող Էդգար Մարտիրոսյանի դուստրն է: 1992 թվականին՝ Թալիշի անկման օրը, Ռոբերտը Էդգարին թողել է գյուղում՝ գերեվարության մեջ, ու յուրացրել մարտի դաշտում արված նրա լուսանկարները: Հետագայում Ռոբերտն այդ լուսանկարների շնորհիվ հանրահայտ է դարձել: Տարիներ հետո դրախտի դարպասների առաջ  Ռոբերտը զղջալով խոստովանում է իր կատարած մեղքը:

 «Արցախպրես»-ի  թղթակցի    հետ զրույցում «Դրախտի դարպասը» ֆիլմի ռեժիսոր Ջիվան Ավետիսյանը, խոսելով կինոյի մասին, ափսոսանք է հայտնում, որ հայ ժողովուրդը կարծես թե հեռացել է այդ արվեստից:

Նրա խոսքով՝ կինոն ունի դաստիարակչական մեծ նշանակություն, հետևաբար սերունդների կապը կինոյի հետ չպետք է ընդհատվի:

«Ֆիլմ նկարահանելը դյուրին գործ չէ. այն պահանջում է լուրջ մոտեցում: Ես ուրախ ու շնորհակալ եմ, որ ԱՀ կառավարությունը, գիտակցելով ֆիլմի կարևորությունը, բարոյական և նյութական աջակցություն է ցուցաբերում մեր թիմին: Ես միշտ ձգտում եմ արցախցիներին էլ ներգրավել իմ կինոների նկարահանումներին, չէ՞ որ այն, ինչը ֆիլմում ներկայացվում է, արցախցիների ապրածն ու զգացածն է: Արցախում ֆիլմի նկարահանումները տեղի են ունեցել Ստեփանակերտում, Շուշիում, Ասկերանի շրջանի Հարավ և Քռասնի գյուղերում: Ի դեպ, «Դրախտի դարպասը» ֆիլմի նկարահանման տեսարաններում ընդգրկել ենք նաև Ստեփանակերտում գործող «Արցախպրես» հայկական լրատվական գործակալությունը: Սա ես կատարել եմ միտումնավոր. նպատակս է՝ աշխարհին ներկայացնել Արցախի մասին հավաստի տեղեկատվություն տարածող Արցախում օնլայն գործող «Արցախպրես» լրատվամիջոցը: Սա էլ է միջոց՝ Արցախն աշխարհին հասու ու ճանաչելի դարձնելու»,-նշել է ռեժիսորը և ավելացրել, որ ֆիլմի նկարահանման մնացած աշխատանքները սեպտեմբերից կշարունակվեն Եվրոպայում:Ֆիլմն ավարտին կհասցվի 2019 թվականի գարնանը:

Ջ. Ավետիսյանի ցանկությունն է ֆիլմում ներկայացնել ոչ թե պատերազմը, այլ պատերազմի թողած հետևանքները՝ մարդկային խեղված ճակատագրերը, չսպիացած հոգեկան ծանր վերքերը:

Ջ. Ավետիսյանը տեղեկացրել է նաև, որ «Դրախտի դարպասը» ֆիլմի տեսարաններում կհնչի գերմանացի կոմպոզիտոր Ռիխարդ Շտրաուսի հայտնի «Էլեկտրա» օպերան, որի հեղինակային իրավունքն արդեն ձեռք է բերվել:

Ֆիլմի գլխավոր դերակատար Ռիխարդ Զամելն ասել է, որ ինքը ֆիլմի նկարահանման սկզբնական շրջանում դժվարությունների է հանդիպել: Թափանցելով իր մարմնավորած հերոսի ներաշխարհը՝ ինքը կարողացել է ամբողջությամբ հաղթահարել:

«Ինտելեկտուալ մակարդակով այս ֆիլմը խոսում է մարդկային բարձր հատկանիշների մասին: Ինձ համար դժվարությունները հաղթահարելուն նպաստել է նկարահանումների ժամանակ զինվորների հետ շփումները, տեղանքի ընտրությունն ու միջավայրը: Դերակատարների ընտրությամբ ֆիլմը համաշխարհային արտացոլանք է ունենալու. անշուշտ, այն միջազգային ճանաչում կբերի Արցախին»,-ասել է Ռ. Զամելը:

Ֆրանսիայից ժամանած ֆիլմի գլխավոր հերոսուհի, աշխարհահռչակ ջութակահար Վլադիմիր Սպիվակովի և հայ դերասանուհի Սաթի Սպիվակովայի դուստր Տատյանա Սպիվակովան պատմել է, որ ծանոթանալով Ջիվանի հետ՝ ինքն իմացել է, որ վերջինս հայկական արմատներով դերասանուհի էր փնտրում իր ֆիլմի համար, ով կկարողանա խոսել մի քանի լեզվով: Եվ նա առաջարկություն ստացավ Ջիվանից՝ նկարահանվելու ֆիլմում: Ծանոթանալով սցենարին՝ համաձայնեց:

«Ինձ համար մեծ պատիվ է Արցախի մասին պատմող ֆիլմում նկարահանվելը, քանի որ ես արմատներով շուշեցի եմ»,-նշել է Տատյանան:

Խոսելով ֆիլմում իր կերպարի մասին՝ Տատյանան ասել է, որ իր մարմնավորած Սոֆիայի կերպարը հետաքրքիր է. նա ժամանակակից, ուժեղ, իմպուլսիվ, խելացի, տաղանդավոր կին է: Սոֆիան ստիպված է եղել հեռանալ տնից և ինքնուրույն կառուցել իր կյանքը: Նա հայտնվել է բարդ իրավիճակում և փորձում է ամեն ինչ անել ստեղծված իրավիճակից դուրս գալու համար:

Առաջին անգամ լինելով Արցախում՝ ֆիլմում օպերային երգիչ Ժանի կերպարը մարմնավորող լիտվացի դերասան Լեո Պոբեդոնոսցևասն էլ ասել է, որ ինքը հիացած էր Արցախով:

«Չեմ հասցրել շատ բան տեսնել Արցախում, բայց տեսածիցս էլ տպավորված եմ: Ինձ համար շատ հաճելի էր շփվել ֆիլմում նկարահանվող մարդկանց հետ. նրանք բարի են, մարդամոտ, կամեցող, հյուրասեր»,-մասնավորապես նշել է Լեոն: