Ռուսաստանի նախագահ Վլադիմիր Պուտինը Սիրիայում ռուսական Սու-24 ռազմական ինքնաթիռի վրա հարձակումը «թիկունքից հարված» է անվանել:
Հարված թիկունքից. Պուտինը մեկնաբանել է Սիրիայում ռուսական Սու-24-ի վրա հարձակումը
ՍՏԵՓԱՆԱԿԵՐՏ, նոյեմբերի 24, ԱՐՑԱԽՊՐԵՍ: РИА Новости-ի փոխանցմամբ `Պուտինի խոսքով՝ ռուսական կործանիչի հետ կապված միջադեպը դուրս է ահաբեկչության դեմ պայքարի շրջանակներից։
«Ռուս օդաչուները և ինքնաթիռը ոչ մի կերպ չեն սպառնում Թուրքիային, դա ակնհայտ է»,- ասել է Պուտինը: Նա նաև հայտարարել է, որ ռուսական ինքնաթիռի վրա հարձակումը եղել է Թուրքիայի հետ սահմանից 1 կիլոմետր հեռավորության վրա, իսկ ինքնաթիռն ընկել է 4 կիլոմետր հեռավորության վրա:
Ռուսաստանի նախագահը հայտարարել է, որ իր երկիրը Թուրքիային միշտ վերաբերել է որպես բարեկամական պետության։
«Մենք կուսումնասիրենք ամենը, ինչ տեղի է ունեցել, և ողբերգությունը կունենա լուրջ հետևանքներ, այդ թվում՝ և ռուս-թուրքական հարաբերությունների համար: Մենք միշտ վերաբերել ենք Թուրքիային որպես բարեկամական պետության: Չգիտեմ՝ ում էր պետք այն, ինչ արվել է այսօր, բայց ամեն դեպքում՝ ոչ մեզ»,- ասել է Պուտինը։
Պուտինը հավելել է, որ Թուրքիան հարված է հասցրել ՌԴ ինքնաթիռին՝ չնայած նրան, որ Ռուսաստանն ԱՄՆ-ի հետ նման միջադեպերի կանխման մասին համաձայնագիր է կնքել:
Նա նշել է նաև, որ ՌԴ-ն վաղուց գրանցել է, որ Թուրքիայի տարածքում շատ նավթ կա ԻՊ-ի հսկողության տակ գտնվող նավթահանքերից:
Հիշեցնենք, որ այսօր թուրք-սիրիական սահմանի սիրիական կողմում կործանվել է ռուսական Սու-24 կործանիչը: Թուրքական կողմի պնդմամբ՝ ինքնաթիռն իրենք են խոցել, քանի որ այն հատել էր Թուրքիայի օդային տարածքը: Ինքնանետված օդաչուների ճակատագիրն անհայտ է:
Թուրքիան Ռուսաստանի դեսպանին կանչել է ԱԳՆ՝ ռուսական Սու-24 ռազմական ինքնաթիռի խոցման միջադեպի հետ կապված։
Թուրքիայի պահանջով այսօր արտահերթ նիստ է գումարելու ՆԱՏՕ-ն՝ քննարկելու ինքնաթիռի հետ կապված միջադեպը։
«Հյուսիսատլանտյան դաշինքի նիստը տեղի է ունենալու այսօր՝ ժամը 17:00-ին (երևանյան ժամանակով ժամը 20.00-ին)՝ Թուրքիայի պահանջով»,-ասել է ՆԱՏՕ-ի ներկայացուցիչը՝ նշելով, որ մամուլի համար որևէ միջոցառում չի նախատեսվում։
