Ռուսաստանի նախագահ Վլադիմիր Պուտինը հայտարարել է, որ արևմտյան երկրները կրկին կռվում են Ռուսաստանի դեմ ուկրաինական բանդերականների ուժերով և սպառնում են գերմանական տանկերով, այս անգամ՝ Leopard-ներով։
Ռուսաստանին կրկին սպառնում են գերմանական տանկերով. Պուտին
ՍՏԵՓԱՆԱԿԵՐՏ, 3 փետրվարի, ԱՐՑԱԽՊՐԵՍ։ Այս մասին ՌԴ նախագահը հայտարարել է Վոլգոգրադում Ստալինգրադի ճակատամարտի 80-ամյակին նվիրված միջոցառմանը ելույթ ունենալիս, գրում է Tert.am-ն։
«Այժմ, ցավոք, մենք տեսնում ենք, որ նացիզմի գաղափարախոսությունը, արդեն իր ժամանակակից դիմակով, իր ժամանակակից տեսքով, կրկին ուղղակի սպառնալիքներ է ստեղծում մեր երկրի անվտանգության համար։ Մենք նորից ու նորից ստիպված ենք ետ մղել հավաքական Արևմուտքի ագրեսիան։ Անհավատալի է, բայց իրականություն է: Մեզ կրկին սպառնում են գերմանական Leopard տանկերը։ Եվ նորից նրանք պատրաստվում են կռվել Ռուսաստանի հետ Ուկրաինայի հողի վրա՝ Հիտլերի հետևորդների, բանդերականների ձեռքերով»,- ասել է Պուտինը։
Նախագահը նշել է, որ, չնայած Արևմուտքի քարոզչությանը, Ռուսաստանն աշխարհում շատ ընկերներ ու դաշնակիցներ ունի։ Պուտինն ասել է, որ նրանք, ովքեր Եվրոպային և մասնավորապես Գերմանիային ներքաշում են Ռուսաստանի հետ պատերազմի մեջ, չեն հասկանում, որ այդ ամենը միայն տանկերով չի սահմանափակվելու։
