Ռուսաստանի Դաշնությունը պատրաստ է պատասխանատվություն կրել իր դիրքորոշման համար և միշտ այնպես է բանակցում, որ «հետո չամաչի»։
Մենք միշտ այնպես ենք բանակցում, որ հետո չամաչենք. Լավրովը՝ Պուտին-Մակրոն գաղտնի բանակցությունների տեքստի արտահոսքի մասին
ՍՏԵՓԱՆԱԿԵՐՏ, հուլիսի 6, ԱՐՑԱԽՊՐԵՍ։Այս մասին չորեքշաբթի հայտարարել է ՌԴ ԱԳ նախարար Սերգեյ Լավրովը՝ մեկնաբանելով Ռուսաստանի և Ֆրանսիայի նախագահներ Վլադիմիր Պուտինի և Էմանուել Մակրոնի միջև գաղտնի բանակցությունների տեքստի՝ ֆրանսիական կողմի կազմակերպած արտահոսքը, տեղեկացնում է Tert.am-ը:
«Սկզբունքորեն մենք այնպես ենք բանակցում, որ երբեք չամաչենք, մենք միշտ ասում ենք այն, ինչ մտածում ենք, և պատրաստ ենք պատասխան տալ խոսքերի համար և բացատրել մեր դիրքորոշումը», - ասել է Լավրովը մամուլի ասուլիսում։
«Կարծում եմ, որ դիվանագիտական էթիկան, իհարկե, չի ենթադրում արձանագրության նման միակողմանի արտահոսք»,- ասել է Լավրովը։
Միևնույն ժամանակ Լավրովը հիշեցրել է, որ ՌԴ պրակտիկայում ևս եղել է դեպք, երբ հրապարակվել է ֆրանսիացի և գերմանացի գործընկերների հետ իր բանակցությունների սղագրությունը:
«Այն ժամանակ մենք դեռ աշխատում էինք նորմանդական ձևաչափի շրջանակում, և այդ ձևաչափով մենք երկար ժամանակ փորձում էինք համոզել Բեռլինին և Փարիզին, որ նրանք պետք է ստիպեն Կիևին դադարեցնել սաբոտաժը մինսկյան համաձայնագրերի կատարման հարցում, որոնք համաձայնեցվել են գերմանացիների և ֆրանսիացիների մասնակցությամբ և հաստատվել են ՄԱԿ-ի Անվտանգության խորհրդի կողմից»,- շարունակել է Լավրովը։
«Բայց նախքան Ֆրանսիայի և Գերմանիայի գործընկերների հետ իմ բանակցությունների բովանդակությունը հրապարակելը, մենք երեք անգամ զգուշացրել ենք նրանց, որ եթե հստակ բացատրություններ չստանանք, թե ինչու են նրանք հրաժարվում իրենց անմիջական մասնակցությամբ համաձայնեցված փաստաթղթերից, ապա մենք ստիպված կլինենք դրանք հանրայնացնել: Նրանք երեք անգամն էլ լռությամբ են պատասխանել, ուստի այստեղ մի փոքր տարբերություն կա»,- եզրափակել է Լավրովը։
