Գեյթսը կոչ է անում ԱՄՆ կառավարությանը շարունակել կարանտինն ավելի քան երկու ամիս. Washington Post
Microsoft-ի հիմնադիր Բիլ Գեյթսը կոչ է արել «հետևողական համազգային մոտեցում ցուցաբերել կարանտինին»՝ SARS-CoV-2 վիրուսի տարածման դեմ պայքարելու համար:
Գեյթսը կոչ է անում ԱՄՆ կառավարությանը շարունակել կարանտինն ավելի քան երկու ամիս. Washington Post
ՍՏԵՓԱՆԱԿԵՐՏ, 4 ապրիլի, ԱՐՑԱԽՊՐԵՍ։SHANTNEWS.am-ի փոխանցմամբ, այս մասին միլիարդատերն ասել է Washington Post-ին տված հարցազրույցում:
Գեյթսը նաև քննադատել է այն փաստը, որ որոշ նահանգապետեր չեն մտցրել սահմանափակող միջոցներ: Հայտնի է, որ հինգ նահանգներ դեռևս չեն կարգադրել բնակիչներին մնալ տանը, իսկ յոթ նահանգում կարանտին է միայն որոշ շրջաններում:
«Այս թեմայի շուրջ խառնաշփոթը միայն կերկարացնի տնտեսական խնդիրները, կբարձրացնի վիրուսի վերադարձի հավանականությունը և կհանգեցնի ավելի մեծ թվով մահերի»,- ասել է նա:
Գեյթսը կարծում է, որ ԱՄՆ կառավարությունը պետք է արագացնի բնակչության, հատկապես բուժաշխատողների թեստավորման գործընթացը և կենտրոնանա պատվաստանյութեր ստեղծելու վրա:
«Այդ դեպքում մենք ականատես կլինենք պատմության մեջ պատվաստանյութի ամենաարագ մշակմանը: Արդեն հիմա կարող եք սկսել գործարաններ կառուցել, որոնցում այս պատվաստանյութերը կարտադրվեն: Առաջատարի դերը պետք է ստանձնի դաշնային կառավարությունը, քանի որ մասնավոր ընկերությունները չեն կարող այդպիսի ռիսկի դիմել»,- նշել է Գեյթսը:
Սա առաջին դեպքը չէ, երբ Բիլ Գեյթսը քննադատում է ԱՄՆ կառավարությանը: Նա անցյալ շաբաթ ասել է, որ պետությունը բավարար օպերատիվ կերպով չի հայտնել ինքնամեկուսացման անհրաժեշտության մասին:
Հիշեցնենք, որ դեռ 5 տարի առաջ Բիլ Գեյթսը կանխատեսել էր, որ վիրուսներն ամենամեծ սպառնալիքն են մարդկության համար, և աշխարհը պատրաստ չէ նոր համաճարակների դեմ պայքարելուն: