Մայրաքաղաքի վերանվանման 96-ամյակին նվիրված` Ստեփանակերտի պատկերասրահում այսօր տեղի է ունեցել Արցախի նկարիչների միության նախագահ Հովիկ Գասպարյանի «Քաղաքը» խորագրով անհատական ցուցահանդեսի բացումը:
Կայացել է Հովիկ Գասպարյանի «Քաղաքը» խորագրով անհատական ցուցահանդեսի բացումը
ՍՏԵՓԱՆԱԿԵՐՏ, 26 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` ցուցահանդեսին ներկայացվել են մոտ 40 կտավներ, որոնք ներկայացնում են մայրաքաղաքի հին ու նոր փողոցները, տեսարժան մի շարք վայրեր և բնապատկերներ:
Շուշիի կերպարվեստի պետական թանգարանի տնօրեն Լուսինե Գասպարյանը շնորհավորել է Հովիկ Գասպարյանին և նշել, որ յուրաքանչյուր անհատական ցուցահանդես նկարչի յուրօրինակ հաշվետվությունն է հանդիսատեսի առջև:
«Այս ցուցահանդեսն իր ձևաչափով միանգամայն տարբերվում է: Ցուցահանդեսը նախ և առաջ ձոն է, սիրո խոստովանություն հարազատ քաղաքին: Յուրաքանչյուրս, նայելով նկարներին, փորձում ենք գտնել մեր քաղաքի սիրելի և գողտրիկ անկյունները: Գեղանկարիչը կարողացել է բացահայտել Ստեփանակերտը այնպիսի տեսանկյունից, որը բոլորին հասանելի չէ»,- ասել է Լ. Գասպարյանը:
«Գյուրջյան» կիրառական արվեստի ինստիտուտի ռեկտոր Յուրի Հովհաննիսյանն էլ նշել է, որ գեղանկարչության այս ճյուղը, որով ստեղծագործել է նկարիչը, թվում է, թե վաղուց մոռացված է մեր հասարակության կողմից:
«Ողջունելի է նկարչի մոտեցումը, քանի որ մենք ունենք հրաշագեղ բնություն պատմական քաղաքում, որն արժանի է հանրությանը ներկայացնելու: Կարծում եմ` Ստեփանակերտի օրվան նվիրված` ցուցահանդեսը հետաքրքիր և գեղեցիկ նվեր է մեր համաքաղաքացիներին: Պատկերված նկարներից յուրաքանչյուրն արված է մեծ խնամքով, գունային հետաքրքիր լուծումներով և բազմերանգ կոլորիտով»,- ավելացրել է Յու. Հովհաննիսյանը:
Ինքը` նկարիչը, գոհ է կատարված աշխատանքից: Ասում է` պատասխանատվության չափը ավելի է մեծացել, երբ որոշել է ցուցահանդես կազմակերպել Ստեփանակերտում:
«Ցուցահանդեսին ներկայացված են վերջին մեկ տարում արված նկարները, որոնք ցուցադրվում են առաջին անգամ: Շարքը առաջիկայում, իհարկե, կընդլայնվի, սակայն, կարծում եմ, այն, ինչ ցանկացել եմ փոխանցել, տեսանելի է»,- նշել է Հ. Գասպարյանը:
Միջոցառմանը ներկա էին պաշտոնատար անձինք, հյուրեր:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -61-:
