ՍՏԵՓԱՆԱԿԵՐՏ, 29 մայիսի, ԱՐՑԱԽՊՐԵՍ: Այս  մասին  «Արցախպրես»-ի  թղթակցի  հետ  զրույցում  ասել է ԱՀ  կրթության, գիտության  և սպորտի  նախարար  Նարինե  Աղաբալյանը:

Ըստ  նրա՝  շատ  կարևոր  է նաև  թիմի  անդամներին   խաղերից  առաջ  ոգևորելը:

«Վստահ եմ, որ  այսօր՝  մայիսի  29-ին,   ԱՀ  նախագահի    հետ  հանդիպումն  ավելի  է  քաջալերելու  Արցախի  ֆուտբոլի հավաքականի անդամներին՝  արժանապատվությամբ  հանդես  գալու  առաջնությանը»,-  նշել  է  նախարարը:

Խոսելով   առաջնության  նախապատրաստական  աշխատանքների  մասին՝ Ն.  Աղաբալյանն  ասել է, որ դրանք գրեթե ավարտված  են,  և    վաղվանից իրենք  սպասում  են  ConiFA-ի   ներկայացուցիչներին   և  հյուրերին Արցախում ընդունելու:  Առաջնությանը  հանդես  է  գալու  8  թիմ. դա  համապատասխանում  է  ConiFA-ի  ձևաչափերին:  Թիմերը  մրցելու  են   4  մարզադաշտերում՝  Ստեփանակերտի, Ասկերանի, Մարտունու  և  Մարտակերտի: Ըստ  ժամանակացույցի վերջնական  խաղացանկը  պատրաստ  կլինի  այսօր   երեկոյան: Արցախի  թիմը    հանդես  է   գալու  բոլոր  4  մարզադաշտերում: Հունիսի  1-ին՝   ժամը  20:00-ին,  Ստեփանակերտի  Ստեփան  Շահումյանի  անվան  մարզադաշտում   տեղի  կունենա   ConiFA-ի    առաջնության   բացման  հանդիսավոր      արարողությունը:

«Առաջնության  մուտքն  ազատ  է: Մենք  ամեն  ինչ  արել ենք, որ  յուրաքանչյուր  ոք  հնարավորություն  ունենա    ներկա  գտնվել  այդ  միջոցառմանը: Վստահ եմ, որ   ոչ  միայն  ֆուտբոլասերների, այլև    բոլորի  համար    կկարողանանք  ապահովել տոնական  տրամադրություն: Այս  առաջնությունը  մեծապես   խթանելու  է  և´  ֆուտբոլի զարգացմանը,  և´  Արցախի  ճանաչմանը,  և´  թե մեր  հայրենիքի  հզորացմանը: Քանի  որ   այս  առաջնությունը   նախադեպ  է   մեզ  համար, մենք    հնարավորինս  պատրաստվել  ենք  բարձր  մակարդակով: Այն  նաև  մեզ  համար  յուրօրինակ   փորձառություն  է լինելու՝ հետագայում  նմանատիպ միջոցառումներ   կազմակերպելու համար»,- ավելացրել  է  մեր  զրուցակիցը:  

Անդրադառնալով  առաջնության   ֆինանսավորման  հարցին՝  Ն.  Աղաբալյանը  նշել է, որ   դրանք  իրականացվում  են պետական  բյուջեի և  հովանավորների  աջակցությամբ: Հովանավորների  շարքում  մասնավորապես   նախարարն  առանձնացրել  է    ամերիկահայ  բարերար  Ալբերտ   Բոյաջյանին, ով     1  մլն  դոլլար  է  տրամադրել  Արցախի   4   մարզադաշտերի  վերանորոգմանը:

Նախարարը  նշել  է   նաև,  որ իրենք  շարունակաբար   ստանում   են    օգնություն:

Այն  հարցին, թե   Ադրբեջանն  ինչպես  է  վերաբերում  Արցախում   ConiFA-ի     առաջնության  անցկացմանը՝   Ն.  Աղաբալյանը  մասնավարապես  պատասխանել է.«Ես   կողմնակից  եմ, որ  մենք  մեր  որևէ   նախաձեռնություն   չկապենք  Ադրբեջանի  արձագանքների  հետ: Այս  տարիների  ընթացքում  մենք  երբևէ  կանգ   չենք  առել,   և  չենք    մտածել Ադրբեջանի    արձագանքների մասին:   Մենք   ամեն  ինչ անում ենք  խաղաղությունն  ավելի  կայուն  դարձնելու  համար, զարգացնում ենք մշակույթը, սպորտը  և հանդես  ենք  գալիս   խաղարար   նախաձեռնություններով: Եթե  անգամ  կա  իրենց  կողմից  բացասական  արձագանքներ,  դա  միայն  խոսում  է  իրենց    անհանդուրժողականության մասին»: