Արցախի պետական համալսարանի լրագրության և գրականության ամբիոնի նախաձեռնությամբ առաջին կուրսի մի խումբ ուսանողներ այցելել են Ստեփանակերտի տուն-ինտերնատ:
ԱրՊՀ մի խումբ ուսանողներ այցելել են Ստեփանակերտի տուն-ինտերնատ
ՍՏԵՓԱՆԱԿԵՐՏ, 14 նոյեմբերի, ԱՐՑԱԽՊՐԵՍ:Այցի ընթացքում ուսանողները տուն-ինտերանատի բնակիչների համար հանդես են եկել բանաստեղծություններով, երգերով: Այնուհետև նրանց են բաժանել քաղցրավենիք և մրգեր:
«Արցախպրես»-ի թղթակցի հետ զրույցում Արցախի պետական համալսարանի լրագրության և գրականության ամբիոնի դոցենտ, բանասիրական գիտությունների թեկնածու Զինաիդա Բալայանն ասել է, որ իրենք պարբերաբար այցելում են տուն-ինտերնատի բնակիչներին:«30 տարուց ավել համալսարանում գործող ուսանողական գրական խմբակը մշտապես կապ է հաստատում նաև տուն-ինտերնատի անդամների հետ: Մեր այցի նպատակն է տեղի բնակիչների հոգիներում ջերմություն և լույս սփռել, ինչպես նաև մեր հայաբարբառ երգով ու ասմունքով ուրախացնել նրանց: Մենք այստեղ ծանոթացանք շնորհաշատ տարեցներին, ովքեր մեզ հետ երգում, պարում և արտասանում էին», -ասել է Զ. Բալայանը:
Միջոցառմանը տուն-ինտերնատի ավագ բուժքույր Ռիտա Հարությունյանն էլ ասել է, որ իրենց մոտ նման այցելությունները հաճախակի են լինում:
«Մեր հաստատությունում ապրում է 85 բնակիչ, որոնց մեծ մասը տղամարդիկ են: Բնակիչների մի մասն ունի հաշմանդամության կարգ: Տուն ինտերնատի բնակիչների մի մասի խնամքն էլ աշխատողների կողմից իրականացվում է տնային պայմաններում: Նրանք այն տարեցներն են, ովքեր ապրում են իրենց տներում, բայց միայնակ են և հոգածության կարիք ունեն: Տնային խնամք ստանում են ԱՀ աշխատանքի, սոցիալական հարցերի և վաերաբնակեցման նախարարություն դիմած և խնամքի կարիք ունեցող 63 տարին լրացած կենսաթոշակառուներն ու հաշմանդամության առաջին, երկրորդ և երրորդ կարգ ունեցող միայնակ քաղաքացիները: Ստեփանակերտի Տուն ինտերնատի բնակիչների մշակութային առօրյան բավականին հագեցած է. նրանք զբաղվում են ընթերցանությամբ ու շյուղագործությամբ, հողագործությամբ, խաղում շախմատ, այցելում թատրոն, կինո և համերգներ»,-մասնավորապես ասել է Ռ. Հարությունյանը:
Մարտունու շրջանի Հացի գյուղից 96-ամյա Մարիա Բալայանը, մեզ հետ զրույցում պատմել է, որ իր ամուսնու և աղջկա մահվանից հետո մնացել է միայնակ և տեղափոխվել տուն-ինտերնատ:
«Շնորհիվ սրտացավ, հոգատար և գործունյա մեր տնօրեն Իրինա Սարգսյանի և աշխատակազմի` մեզ համար ստեղծված են բոլոր հարմարավետ պայմանները, որպեսզի մենք մեզ զգանք ինչպես տանը: Այստեղ բոլորս կապված ենք իրար: Տարբեր կառույցների ներկայացուցիչներ են այցելում մեզ՝ ծանոթանում մեր առօրյային, զրուցում, ուրախացնում և ոգևորում:: Շնորհակալ ենք մեր պետական կառույցների աշխատակիցներին, բարերաներին, ովքեր հոգ են տանում մեր մասին »,- նշել է Մ. Բալայանը:
