ՍՏԵՓԱՆԱԿԵՐՏ, հունիսի 26, ԱՐՑԱԽՊՐԵՍ: «Արցախպրես»-ի թղթակցի հետ զրույցում Քարին տակ համայնքի ղեկավար Մխիթար Առուշանյանն ասել է, որ աշխատանքները սկսվել են մոտ 10 օր առաջ. համակարգերը նախատեսվում է տեղադրել 132 առանձնատներում:

 

«Ծրագիրը մեծ նշանակություն է ունենալու ընտանիքների սոցիալ-կենցաղային վիճակը բարելավելու համար: Բացի առանձնատներից, արևային ջրատաքացուցիչներ են տեղադրվելու նաև համայնքային տանը, հանդիսությունների սրահում, մանկապարտեզում և դպրոցում:

Սարքավորումները տեղադրող կազմակերպության կողմից տրամադրվում է երաշխիք՝ ցանկացած խափանման դեպքում համակարգի աշխատանքը բնականոն դարձնելու համար: Ուրախ ենք, որ էներգիայի կիրառման պրակտիկան «Հայաստան» համահայկական հիմնադրամը սկսում է Քարին տակից: Թեպետ գյուղը գազաֆիկացված է, բայց կենցաղում էլեկտրաէներգիայի կամ գազի կիրառումը ծախսատար է»,- ավելացրել է Մ. Առուշանյանը:

Իսկ «Եզնիկ Մոզյան արհեստագործական ուսումնարան»-ի վարպետ Ռաֆայել Արզումանյանը նշել է, որ աշխատանքը կատարում են ուսումնարանի 4 աշկերտների հետ միասին:

 

Մինչ ծրագրի մեկնարկը՝ մոտ 1 ամիս առաջ, վարպետները ևս ուսումնարանում անցել են վերապատրաստման դասընթացներ:

 

«Արևային ջրատաքացուցիչները բաղկացած են բաքից, կարկասից և կոլբաներից: Կարկասը տեղադրվում է կտուրում, որից հետո տեղի է ունենում լարերի ընդհանուր մոնտաժ, միացում տաք ջրին: Համակարգը տեղադրվում է տանիքի վրա՝ դեպի հարավ: Այն արևից հավաքում է էներգիան, որից հետո կոլբաների մեջ տաքացնում ջուրը, փոխանցում բաքերին, որտեղից էլ ջուրն անցնում է ընդհանուր համակարգի մեջ: Եղանակային անբարենպաստ պայմաններում, երբ արևի ջերմությունը չի բավարարում աշխատելու համար, գործում է տենային համակարգը: Բացի դրանից, արևային ջրատաքացուցիչներն ունեն սենսորային բլոկ, որը ցույց է տալիս տարայում առկա ջրի քանակը, ջերմաստիճանը: Այդ համակարգում ջուրը տաքանում է մինչև 80 աստիճան»,- մանրամասնել է Ռ. Արզումանյանը:

 

Քարին տակի բնակիչ Անուշ Բալասանյանն էլ, ով արդեն օգտվում է արևային ջրատաքացուցիչներից, մեզ հետ զրույցում նշել է, որ սա շոշափելի աջակցություն է համայնքի բնակիչներին: Այն հնարավորություն կտա բարելավելու կենցաղային պայմանները և կրճատելու ծախսերը: