Ադրբեջանի կողմից Արցախի շրջափակման հետևանքով կան ոլորտներ, որոնց հասցվել է անդառնալի և անվերականգնելի վնասներ՝ տնտեսության ճյուղեր, մասնավորապես՝ գյուղատնտեսություն, կրթական, ֆինանսական համակարգեր և այլն:
Գուրգեն Ներսիսյանը ներկայացրել է ավելի քան 100 օր շարունակվող շրջափակման սոցիալ-տնտեսական հետևանքները
ՍՏԵՓԱՆԱԿԵՐՏ, 23 մարտի, ԱՐՑԱԽՊՐԵՍ։ Այս մասին մարտի 23-ին տեղի ունեցած հեռուստակամրջի ընթացքում նշել է Արցախի Հանրապետության պետական նախարար Գուրգեն Ներսիսյանը անդրադառնալով արդեն 102 օր շարունակվող շրջափակման սոցիալ- տնտեսական հետևանքներին ու արցախահայության նվազագույն կենսաապահովման ուղղությամբ Կառավարության կողմից ձեռնարկվող քայլերին:
«Միայն տեղական հարկային եկամուտները կրճատվել են 70 տոկոսով, առկա է գործազրկության մեծ ցուցանիշ: Բավականին կրճատվել և վնաս է հասցվել ՀՆԱ-ին, միայն Արցախում գործող տնտեսվարող սուբյեկտների 20 տոկոսը դադարեցրել է գործունեությունը, իսկ մնացյալները մի կերպ պետական աջակցությամբ փորձում են պահպանել իրենց գոյությունը: 2020 թվականի պատերազմի հետևանքով Ադրբեջանի կողմից օկուպացված տարածքներից բռնի տեղահանվել են 9000 քաղաքացի, որոնցից 15000 բնակվում է Արցախում, և նրանք այդքան արհավիրքներ կրելուց հետո ստիպված են հիմա առերեսվել շրջափակման ծանր հետևանքներին»,-մանրամասնել է Գ. Ներսիսյանը՝ հավելելով, որ ապավինելով Ռուսական խաղաղապահ զորակազմի և Կարմիր խաչի միջազգային կոմիտեի արցախյան ներկայացուցչության օգնությանը, այս ընթացքում նրանց միջոցով հնարավոր է եղել մի կերպ պարեն, դեղորայք և առաջին անհրաժեշտության ապրանքների նվազագույն չափաքանակ ձեռքբերել: Արցախից ծանր հիվանդները ՀՀ մասնագիտաված բուժհաստատություններ են տեղափոխվում Կարմիր խաչի ներկայացուցչության միջնորդությամբ և ուղեկցությամբ: Տեղում դադարեցվել են բոլոր վիրահատական միջամտությունները:
Նա բարձր է գնահատել աշխարհասփյուռ հայության կողմից ընթացքում ցուցաբերված աջակցությունը՝ երախտագիտություն հայտնելով բոլոր նրանց, ովքեր այս ողջ ընթացքում անդադար Արցախի հետ են և ամեն ինչ անում են երկրի առջև ծառացած խնդիրները լուծելու և ծանր հետևանքները մեղմելու համար:
«Առանց ձեր աջակցության, մենք անհամեմատ ավելի ծանր պայմաններում կլինենք: Բայց ուզում եմ նաև հայտարարել, որ առանձին անհատների ջանքերն բավարար չեն: Համոզված եմ, որ սփյուռքահայությունն ունի անհամեմատ ավելի մեծ ներուժ և այն համախմբելու, իրավիճակը սթափ և ողջախոհ գնահատելու դեպքում, կարող են մեծ աջակցություն ցուցաբերել:
Արցախն այսօր համայն հայության արժանապատիվ անունն է, Արցախը մեր բոլորիս դեմքն է: Գուցե նա հիմա կնճռոտված է, ծերացած կամ թույլ է հիմա, բայց ծնողը մնում է ծնող, երբեք ծնողի արժանապատվությունը չի կարող ստորադասվել ինչ որ բանի: Մենք պետք է պահապան լինենք մեր մայր հողին»,- շեշտել է պետնախարար Ներսիսյանը:
Դիմելով միջազգային հանրությանը նա ընդգծել է, որ 2020 թվականի սեպտեմբերի 27-ից սկսած, աչքի առաջ շուրջօրյա տեղի են ունենում ներկա օրերի ու ժամանակների հետ անհամատեղելի ոճրագործություններ, մարդկային պարզագույն իրավունքների ոտնհարման բացահայտ փորձեր:
«Միջազգային հանրությունը շարունակում է լուռ մնալ: Այդ պատճառով Ադրբեջանը ամեն օր ավելի է ուժեղացնում իր ագրեսիվ քաղաքականությունը: Երեք ամիս շարունակ Ադրբեջանը ոչ միայն ըստ անհրաժեշտության և առարկայացված չի քննադատվել միջազգային հանորւթյան կողմից, այլև ցուցաբերված պասիվությունից ու անգործությունից օգտվելով, նույնիսկ ավելի սաստկացրեց իր գործողությունները՝ կատարելով սպանություններ: Այդ ամենից հետո էլ շարունակել է մնալ անպատիժ ու անպատասխան: Անկատար են մնացել Մարդու Իրավունքների Եվրոպական Դատարանի և ՄԱԿ-ի միջազգային դատարանի որոշումները, որոնցով սահմանվել էր միջացքը և Արցախը Հայաստանին կապող ճանապարհը ապաշրջափակելու Ադրբեջանի պարտականությունը»,-եզրափակել է Արցախի Հանրապետության պետական նախարարը: