Ադրբեջանի կողմից Արցախի շրջափակման պայմաններում անգամ Կիոկուշին կարատեի աղջիկների խումբը չի դադարեցրել պարապմունքները։
Շրջափակման պատճառով միջազգային մրցաշարերին մասնակցելը կասկածի տակ է դրված. մարզիչ
ՍՏԵՓԱՆԱԿԵՐՏ, 17 փետրվարի, ԱՐՑԱԽՊՐԵՍ: «Արցախպրես»-ի թղթակցի հետ զրույցում խմբի մարզիչ Ծովինար Ավանեսյանն ասել է, որ նույնիսկ ստեղծված իրավիճակում ապագա մարզուհիների մեջ չի մարել մարզվելու, հետագայում ձեռքբերումներ ունենալու ցանկությունը։
«Չնայած յուրաքանչյուրս անհանգստացած են ստեղծված իրավիճակով, բայց շարունակում ենք մեր աշխատանքը։
Հովհարային անջատումներով պայմանավորված` երեկոյան ժամերին նախատեսված պարապմունքները կազմակերպում ենք առավոտյան ժամերին։ Այսօր թիմն ունի 25 անդամ, և նրանք հաճույքով են մասնակցում պարապմունքներին:
Ընդունելությունը մեզ մոտ կազմակերպվում է չորս տարեկանից՝ առանց տարիքային սահմանափակման»,-նշել է մեր զրուցակիցը։
Նա տեղեկացրել է, որ թիմի երկու անդամներ Ասկերանի շրջանի Նորագյուղ համայնքից են և տրանսպորտի խնդրի պատճառով այս օրերին չեն կարողանում մասնակցել պարապմունքներին, մինչդեռ յուրաքանչյուր պարապմունք կարևոր է. առաջիկայում թիմը պետք է մասնակցի Վրաստանում կայանալիք մրցույթին։
«Հույս ունենանք, որ Արցախը Հայաստանին կապող միակ ճանապարհը շուտով կբացվի, և մենք կկարողանանք մասնակցություն, ինչու չէ նաև մրցանակային տեղեր ապահովել»,-հավելել է մարզիչը։
15-ամյա Աննա Սաֆարյանը մեզ հետ զրույցում նշել է, որ արդեն երկու տարի է` մասնակցում է Կիոկուշին կարատեի մարզումներին։ Այս օրերին էլ ավելի շատ է պարապում. դա ընտրել է միջոց` հաղթահարելու ստեղծված իրավիճակը։
«Ես այն երեխաների խմբում էի, ովքեր երկար ժամանակ չէին կարողանում վերադառնալ Արցախ։
Բայց ԿԽՄԿ-ի առաքելության շնորհիվ արդեն տանն եմ։
Հավատում եմ, որ մեր աշխատանքով ու ձեռքբերումներով կկարողանանք շենացնել Արցախը»,-ընդգծել է Ա. Սաֆարյանը։