Այսօր՝ դեկտեմբերի 1-ին, Ստեփանակերտի Մշակույթի և երիտասարդության պալատում տեղի է ունեցել «Հույզերի աշուն» խորագրով գրական-երաժշտական միջոցառում, որը կազմակերպվել է Արցախի պետական համալսարանի Մանկավարժության և սպորտի ֆակուլտետի Հոգեբանության և մանկավարժության բաժնի նախաձեռնությամբ:
Ստեփանակերտում ԱրՊՀ ուսանողների նախաձեռնած գրական-երաժշտական միջոցառմանը միացել են նաև Շուշիի Խ.Աբովյանի անվան դպրոցի սաները
ՍՏԵՓԱՆԱԿԵՐՏ, 1 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ մինչ միջոցառման մեկնարկը, ներկաները լռության րոպեով հարգել են Արցախյան պատերազմներում նահատակված տղաների հիշատակը։
Հոգեբանության և մանկավարժության ամբիոնի ավագ դասախոս Արմինե Ավանեսյանը մեզ հետ զրույցում ասել է, որ նման միջոցառումներ հաճախակի են կազմակերպվում: «Միջոցառումը միտված է ցույց տալու, որ բուհում ուսանողները ստանում են ոչ միայն զուտ մասնագիտական գիտելիքներ, այլև մենք շարունակում ենք նպաստել նրանց աշխարհայացքի, մշակույթի ու արվեստի նկատմամբ սիրո ձևավորմանը: Մանկավարժը պետք է լինի ստեղծագործ, արվեստասեր, որպեսզի հետագայում իր սաներին ևս փոխանցի այդ շնորհները, որովհետև արվեստի ու մշակույթի միջոցով մենք պահպանում ենք մեր ազգայինը»,-ասել է Ա. Ավանեսյանը:
Նրա համոզմամբ՝ նման միջոցառումները ապացուցում են, որ ուսանողները, բացի ուսման մեջ առաջադիմություն գրանցելուց, պատրաստ են նաև իրեն դրսևորել տարբեր ասպարեզներում:
Միջոցառման ընթացքում Արցախի մայր բուհի ուսանողները հանդես են եկել բանաստեղծական ու երաժշտական կատարումներով: Նրանց էին միացել Շուշիի Խաչատուր Աբովյանի անվան դպրոցի նախապատրաստական խմբի սաները:
