Այսօր՝ հոկտեմբերի 5-ին, Արցախի Հանրապետության ԿԳՄՍ նախարարության կողմից Ստեփանակերտի Սայաթ-Նովայի անվան երաժշտական քոլեջում կազմակերպվել է Ուսուցչի օրվան նվիրված միջոցառում:
Ստեփանակերտում Ուսուցչի օրվան նվիրված միջոցառում է կազմակերպվել
ՍՏԵՓԱՆԱԿԵՐՏ, 5 հոկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը ներկա էին նաև ԱՀ Ազգային ժողովի նախագահ Արթուր Թովմասյանը, պաշտոնատար այլ անձինք:
Շնորհավորելով ուսուցիչներին մասնագիտական օրվա առթիվ, ԱՀ պետական նախարար Արտակ Բեգլարյանը արժևորել է նրանց առաքելությունը պետականակերտման գործում:
«Ուզում եմ շնորհակալություն հայտնել ձեր վաստակի, անխոնջ ծառայության, առաքելության համար: Հավաստիացնում եմ առաջիկայում էլ ավելի մեծ ուշադրություն ենք դարձնելու ուսուցիչների և ընդհանրապես կրթական համակարգի խնդիրների վրա, որպեսզի փուլ առ փուլ ու համատեղ ջանքերով կարողանանք հաղթահարել մեր առջև ծառացած դժվարությունները , աստիճանաբար բարձրացնել ուսուցչի դերը մեր հասարակության մեջ»-ասել է Ա. Բեգլարյանը՝ ընդգծելով, որ շարունակական ինքնակատարելագործման շնորհիվ ժամանակի ընթացքում, հնարավոր կլինի կանգնել պետության հիմքերում և հաղթահարել ծառացած բոլոր դժվարությունները:
ԱՀ ԿԳՄՍ նախարար Անահիտ Հակոբյանը միանալով տոն օրվա շնորհավորանքներին, բարձր է գնահատել ուսուցիչների այն սերն ու նվիրումը, որ նրանք ներդնում են մատաղ սերնդի կրթության և դաստիարակության գործում:
Ուսուցիչների մեծարման երեկոն ուղեկցվել է Ստեփանակերտի Սայաթ-Նովայի անվան երաժշտական քոլեջի, Արվեստի և Կոմիտասի անվան երաժշտական դպրոցների սաների կատարումներով:
