Այսօր՝ սեպտեմբերի 29-ին, ԱՀ ԱԺ 7-րդ գումարման 6-րդ նստաշրջանի առաջին նիստում խորհրդարանը քննարկել և 28 կողմ ձայնով հավանության է արժանացրել ««Տեղական տուրքերի և վճարների մասին» օրենքում լրացում կատարելու մասին» ԱՀ օրենքի նախագիծը:
Համայնքի տարածքում բացօթյա առևտրի թույլտվության համար սահմանվել է օրական 100-350 դրամի չափով տեղական տուրք
ՍՏԵՓԱՆԱԿԵՐՏ, 29 սեպտեմբերի, ԱՐՑԱԽՊՐԵՍ: Ըստ այդմ՝ համայնքի տարածքում բացօթյա առևտուր կազմակերպելու թույլտվության համար (բացառությամբ մետաղադրամով և (կամ) թղթադրամով շահագործվող ավտոմատների միջոցով սննդի առևտրի կազմակերպման) տեղական տուրքը կսահմանվի յուրաքանչյուր օրվա համար՝ 100-350 դրամ։
ԱԺ նիստում 26 կողմ ձայնով օրենքի ուժ է ստացել նաև «Գույքահարկի մասին» օրենքում լրացումներ և փոփոխություններ կատարելու մասին», ««Հողի հարկի մասին» օրենքում փոփոխություններ կատարելու մասին», ««Հարկերի մասին» օրենքում փոփոխություն կատարելու մասին» օրենքների նախագծերի փաթեթը:
Օրինագծերի փաթեթի ընդունման անհրաժեշտությունը պայմանավորված է Արցախի Հանրապետության օրենսդրությունը Հայաստանի Հանրապետությունում 2021 թվականից գործող թափանցիկ կառավարվող և ընդլայնված հնարավորություններով գույքային հարկերի էլեկտրոնային հարթակի համապատասխանեցման և ներդրման հետ:
Ըստ այդմ՝ կկարգավորվեն գույքային հարկերի վճարման հասանելիության ու մատչելիության հետ կապված խնդիրները, ինչպես նաև կկրճատվեն հարկ վճարողների հետ անմիջական շփումները և կստեղծվեն ռեսուրսների տնտեսման հնարավորություններ: