Արցախի Հանրապետության Ազգային ժողովի պատգամավոր, Արտաքին հարաբերությունների մշտական հանձնաժողովի անդամ Արամայիս Աղաբեկյանի համոզմամբ՝ ԱՀ նախագահ Արայիկ Հարությունյանի սեպտեմբերի 19-ի տեսաուղերձը՝ առանձնահատուկ էր, քանի որ արտաքին քաղաքական որոշ մեսիջներ էր պարունակում, որոնց մասին նախկինում չէր խոսվել:
Նախագահի ուղերձը սառը ցնցուղ էր՝ դրական արձագանքներով.ԱՀ ԱԺ պատգամավոր
ՍՏԵՓԱՆԱԿԵՐՏ, 21 սեպտեմբերի, ԱՐՑԱԽՊՐԵՍ: «Առաջին լրատվական»-ի հետ զրույցում այս մասին նշել է ԱՀ ԱԺ պատգամավորը՝ Նախագահի ուղերձը սպասված համարելով ինչպես Արցախում, այնպես էլ ՀՀ-ում և արտերկրում:
«Ե՛վ օգոստոսյան դեպքերը, և՛ մինչ այդ տեղի ունեցածը, տարբեր ընկալումներ էին ստեղծել: Բացի այդ, ներքաղաքական տարբեր նպատակներ հետապնդող որոշ խմբերի կողմից ոչ ճշմարիտ կամ ոչ ճշգրիտ և պետականության դեմ ուղղված տարբեր ինֆորմացիաների տարածման, ինչպես նաև Ադրբեջանի տեղեկատվական քարոզչության դեմ առնելու համար անհրաժեշտ էր մի այսպիսի ուղերձ: Դրանում խոսվել է նաև մի շարք ներքին խնդիրների մասին, որոնք Արցախում ավելի շատ ընկալելի են զգացմունքային դաշտում, և տրվել են հստակ պատասխաններ»,-ասել է Ա. Աղաբեկյանը՝ երկրի ղեկավարի ուղերձի կարևոր առանձնահատկություններից նշելով նաև պոպուլիզմի բացակայությունը. այն է՝ ցանկալիի փոխարեն իրականության մասին խոսելը:
«Ներկայացվեց իրականությունը, վերահաս և հնարավոր վտանգների գոյության մասին, որն առաջին հայացքից կարող է հակասական և իրարամերժ զգացողությունների տեղիք է տալ, բայց ուղերձը պետք է նաև սառը ցնցուղի էֆեկտը ունենար, որպեսզի ժողովուրդը գիտակցի, թե ինչպիսի մարտահրավերների առաջ ենք կանգնած»,-ընդգծեց պատգամավորը՝ հավելելով, որ Նախագահի ուղերձը նաև իր անձի քննադատությամբ, սեփական հեղինակության հաշվին պետական շահը պաշտպանելուն ուղղված ևս մի քայլ էր:
Ըստ պատգամավորի՝ այս մոտեցումն առանցքային նշանակություն ունի և Արցախի, և ՀՀ իշխանությունների համար, քանի որ ներկայի մարտահրավերների պարագայում, ներքին քարոզչական նախկին թեզերը կարող են մեծ վնաս հասցնել արտաքին ճակատում:
«Ամենակարևոր տրվել են հարցերի պատասխաներ, որոնք օդում կախված էին կամ տարբեր խողովակներով տարածվել էին, օրինակ այն տեղեկություններին, թե իբր Արցախն առանձին հարաբերություններ է սկսել Ադրբեջանի հետ, որին որոշակի կոնտեքստներ էին տրվել: Դրանք տարվում էին այն ուղությամբ, որ իբր տեխնիկական հարաբերություններն Ադրբեջանի և մեզ համար ոչ դաշնակից պետությունների կողմից կարող են ներկայացվել որպես քարոզչական թեզ՝ առ այն, թե Ադրբեջանն իր ներքին հարցերն ինքնուրույն է կարողանում լուծել: Նման խոսակցություններին ուղիղ պատասխան տրվեց՝ որոշակի տեխնիկական, ենթակառուցվածքային խնդիրներ կան որոնք անհնար է հաշվի չառնել: Դրանով հանդերձ, սակայն, կան հստակ քաղաքական և իրավական ուղենիշներ, որոնք հանրայնորեն ուրվագծված են: Արցախը հայկական պահելու պայմանը ժողովրդագրությունն ապահովելն է, ինչի համար որոշակի տեխնիկական հարաբերություներ ունենալն անհրաժեշտություն և կարիք է: Այդ մասին Արցախի Հանրապետության իշխանությունը ոչինչ ցանկություն չունի թաքցնելու իր ժողովրդից և ոչ էլ այլ քաղաքական ուժերի կողմից պիտի այլ, սխալ կոնտեքստում ներկայացվելու հնարավորություն տրվի, որովհետև ժողովուրդը հիմա գտնվում է զգացմունքային վիճակում և ցանկացած բացասական տեղեկություն մեծ արձագանք է ստանում»,-եզրափակեց Ա. Աղաբեկյանը: