«Սեր Արցախ» բարեգործական ծրագրի շրջանակներում նորածինների մայրերը նվեր-տուփեր են ստացել
Այսօր՝ հունիսի 1-ին, «Աննա Աստվածատուրյան» հիմնադրամն իր հերթական ծրագրի՝ «Սեր Արցախ» բարեգործական նախագծի շրջանակներում, նվեր֊տուփ է տրամադրել բոլոր այն նորածիններին, ովքեր այսօր գտնվում են Ստեփանակերտի մոր և մանկան առողջության պահպանման կենտրոնում:
«Սեր Արցախ» բարեգործական ծրագրի շրջանակներում նորածինների մայրերը նվեր-տուփեր են ստացել
ՍՏԵՓԱՆԱԿԵՐՏ, 1 հունիսի, ԱՐՑԱԽՊՐԵՍ։ «Արցախպրես»-ի թղթակցի հետ զրույցում «Աննա Աստվածատուրյան» հիմնադրամի ներկայացուցիչ Արմինե Վարդանյանն ասել է, որ ծրագրի նպատակն է Արցախի բնակչությանը, նոր ծնվող երեխաներին ու իրենց ծնողներին ասել, որ Սփյուռքը նրանց հետ է, սիրում ու հոգատար է նրանց հանդեպ։
«Յուրաքանչյուր նվեր նախագծված է հիմնադրամի կողմից: Մանրամասն ուսումնասիրվել է, թե ինչ է անհրաժեշտ ծնողին, երեխային ծննդյան առաջին օրերից: Այսօրվա ընթացքում արդեն 16 փոքրիկ ստացել է իր նվեր-տուփը: Առաջիկա ամիսների ընթացքում ծրագիրը շարունակական կլինի: Այս պահի դրությամբ իրականացվում է դրամահավաք, և հավաքված ամեն լուման ծառայելու է նոր նվերների գնմանը։ Հույս ունենք, որ ծրագիրը տևելու է ոչ թե ամիսներ, այլ՝ տարիներ»,-նշել է Ա. Վարդանյանը:
Նա տեղեկացրել է, որ երկու օր հետո կիրականացվի նվերների հանձնման երկրորդ փուլը։ Դա կկրի պարբերական բնույթ. երկու օրը մեկ երեխաներին կհանձնվեն նվերներ:
Ծրագիրը կիրականացվի նաև Մարտունու և Մարտակերտի ծննդատներում:
Շահառու Անի Սարգսյանը մեզ հետ զրույցում նախաձեռնության համար շնորհակալություն է հայտնել «Աննա Աստվածատուրյան» հիմնադրամին:
«Լինելով Հայաստանի Հանրապետության քաղաքացի՝ ամուսանցել և ընտանիք եմ կազմել Արցախում, առաջին բալիկս ծնվել է այստեղ: Ես ինձ արդեն արցախցի եմ համարում և խոստանում եմ շենացնել Արցախը, շատ բալիկներ ունենալ, որպեսզի պաշտպանեն հայրենիքը, և ամեն ինչ փորձենք ավելի լավը դարձնել»,-ասել է Ա. Սարգսյանը:
«Աննա Աստվածատուրյան» հիմնադրամի նախագահը Աննա Աստվածատուրյան Թերքոթն է, ամերիկաբնակ հայ գրող, բարերար, իրավաբան, Վեստբրուկ բնակավայրի քաղխորհրդի ընտրված նախագահ։ Աննան նաև «Ոչ մի տեղ․ արտաքսման մի պատմություն» (անգլ.՝ Nowhere, a Story of Exile) ինքնակենսագրական գիրքի հեղինակն է` հիմնված 11 տարեկանում գրված իր օրագրի վրա, որում նա ներկայացնում է Բաքվում հայերի ջարդերից փախչող իր ընտանիքի պատմությունը: 2013 թվականին նա Մենում հաջողությամբ աշխատել է օրենսդիր մարմնի կողմից Արցախի Հանրապետության պաշտոնապես ճանաչման ուղղությամբ: Դրանից ի վեր Աստվածատուրյան Թերքոթը Հայաստանում և Արցախում իրականացրել է բարեգործական մի շարք ծրագրեր: 2020թ. հիմնել է «Աննա Աստվածատուրյան» բարեգործական հիմնադրամը: Հիմադրամի խոշոր նախագծերից է 44-օրյա պատերազմից հետո իրականացված «Արցախյան պատերազմ 2020. կորուստներ, մարտահրավերներ և դիմակայության զարգացման հնարավորություններ» հետազոտությունը: Այժմ «Աննա Աստվածատուրյան» հիմնադրամը մեկնարկում է «Սեր Արցախ» ծրագիրը, որն ուղղված է Արցախում նորածին երեխաներ ունեցող ընտանիքների աջակցությանը: