Այսօր՝ դեկտեմբերի 4-ին, Ստեփանակերտի Աստվածամոր Սուրբ Հովանի Մայր տաճարում տրվել է եկեղեցուն կից «Կիրակնօրյա դպրոց» ծրագրի մեկնարկը։
Արցախում տրվել է «Կիրակնօրյա դպրոց» ծրագրի մեկնարկը
ՍՏԵՓԱՆԱԿԵՐՏ, 4 դեկտեմբերի, ԱՐՑԱԽՊՐԵՍ։ «Արցախպրես»-ի թղթակցի հետ զրույցում Ստեփանակերտի Աստվածամոր Սուրբ Հովանի Մայր տաճարի հոգևոր հովիվ Տեր Ներսես քահանա Ասրյանն ասաց, որ Կիրակնօրյա դպրոցի բացման նպատակները լայն ընդգրկություն ունեն։ Մեր հիմնական խնդիրը հոգևոր դաստիարակությամբ ու ազգային-եկեղեցական ավանդույթների հիման վրա հայ քրիստոնեական արժեհամակարգը մատաղ սենդին փոխանցելն է:
«Ծրագրում ընդգրկվել են 8-12 տարեկան 60-ից ավելի երեխաներ։ Սկզբնական փուլում նրանք կսովորեն նկարչություն, երաժշտություն, և կստանան հոգևոր դաստիարակություն։ Քանի որ մինչև դեկտեմբերի 24-ը հանրապետությունում կարանտին է հայտարարված, իսկ մեզ համար մեր երեխաների առողջությունը շատ թանկ է և չենք ուզում վտանգել այն, այդ իսկ պատճառով կիրակնօրյա դպրոցի դասընթացները կմեկնարկեն գալիք տարվա հունվար ամսից»,- նշել է Տեր Ներսես քահանան՝ տեղեկացնելով, որ այսօր «Կիրակնօրյա դպրոց» ծրագրի մեկնարկը տրվել է նաև Մարտակերտի Սուրբ Կարապետ եկեղեցու երիցատանը։ ԱՀ ԿԳՄՍ նախարար Լուսինե Ղարախանյանը ողջունել է կիրակնօրյա դպրոցների բացումը և նշել, որ մեր հայացքները դեպի Աստված ուղղելով միայն կարող ենք ունենալ ապագայի հիանալի տեսլական։
