Թումո ստեղծարար տեխնոլոգիաների կենտրոնը իրականացրել ու շարունակում է իր առաքելությունը՝ ինչպես մինչև պատերազմը, այնպես էլ դրա ընթացքում և հիմա։
Հայրենիքի կանչով Նյու Յորքից Ստեփանակերտ. զրույց Արուսյակ Մարգարյանի հետ
ՍՏԵՓԱՆԱԿԵՐՏ, 23 հունիսի, ԱՐՑԱԽՊՐԵՍ: Այս մասին «Արցախպրես»֊ի թղթակցի հետ զրույցում նշեց Թումո ստեղծարար տեխնոլոգիաների Ստեփանակերտի գրասենյակի ղեկավար Արուսյակ Մարգարյանը։
Նրա հավաստմամբ՝ պատերազմը ցույց տվեց, որ զարգացած տեխնոլոգիաները վճռորոշ նշանակություն կարող են ունենալ: Թումոն այս գաղափարն իր մեջ կրել է ստեղծման առաջին օրվանից և իրականացվող կրթական ծրագիրը դրա վկայությունն է: Ժամանակակից պատանին «դատապարտված» է կապված լինել տեխնոլոգիաներին, քանի որ դրանք արդեն ոչ միայն մեր կենցաղի անբաժանելի մասն են, այլ նաև կանխորոշում են մեր ապագան ու մեր կյանքի որակը: Տեխնոլոգիաները Թումոյի կրթական ծրագրի առանցքն են, ու սա վերաբերում է ոչ միայն հենց տեխնոլոգիական ոլորտներին, այլ նաև արվեստի այնպիսի ոլորտների, ինչպիսիք են նկարչությունը, ստեղծագրությունը և այլն: Թումոյի նպատակն է ներդնել տեխնոլոգիական ու ինժեներական մտածողություն, որը կտա բավարար ճկունություն` դիմակայելու մարտահրավերներին և շարժվելու ժամանակին համահունչ:
«Մեր ուսանողը ոչ միայն պետք է կարողանա օգտվել տեխնոլոգիաներից` իր համար լավագույն կրթական ուղին որսալու, այլ նաև հետագայում զարգացնելու այդ տեխնոլոգիաները, կիսվելու դրանցով մյուսների հետ և հարստացնելու երկիրն ու աշխարհը:
Այդ տեխնոլոգիաներն ու պատանիների ստեղծարար միտքը կարող են վահան հանդիսանալ մեզ համար, այնպես որ մենք շարունակելու ենք առաջնային դեր տալ դրանց», - կարևորեց Ա. Մարգարյանը:
Պատերազմի օրերին Թումո կենտրոն բացվեց Ալբանիայի մայրաքաղաք Տիրանայում, պատերազմից անմիջապես հետո` Բեռլինում, իսկ արդեն դեկտեմբերին բացվեցին Թումոյի առաջին արբանյակային, շարժական կենտրոնները` Թումո տուփերը` Հայաստանի Բերդ և Գավառ քաղաքներում: Կենտրոնի ղեկավարն առանձնանշեց ակնհայտ փաստը, որ հատկապես պատերազմից հետո հանրության շրջանում ակտիվացան ժամանակակից կրթության ու գիտության կարևորության մասին քննարկումները:
Նա ուրախությամբ հավելեց՝ Թումոն ևս իր կրթական բազմաթիվ նախագծերով ջանում է ծառայել այս նպատակին` Հայաստանի ու Արցախի պատանիների համար ստեղծելով միջավայր, որտեղ նրանք կկարողանան սիրով լցվել կրթության ու հատկապես ինքնակրթության նկատմամբ: Ուսանողների թիվը պատերազմից հետո հայտնի պատճառներով, ցավոք, նվազել է, բայց Թումո ստեղծարար տեխնոլոգիաների կենտրոնն անում է ամեն ինչ՝ նոր ուսանողներ և աշխատակիցներ ներգրավելու համար: «Մասնավորապես, փոքր համայնքներից Ստեփանակերտ ուսանողների երթևեկությունն ապահովելու համար աշխատում ենք Արցախի կառավարության հետ, ինչպես նաև փորձում ենք մեր ներկայությունը ապահովել այլ շրջաններում», - ասաց Ա. Մարգարյանը՝ կարևորելով, որ պատերազմից հետո մեթոդաբանության մեջ փոփոխություն չի եղել, քանի որ նրանց առաքելությունը այնպիսի ճկուն մտածողություն սերմանելն է, որ մարդը կարողանա դիմակայել ժամանակակից աշխարհի մարտահրավերներին ու ավելին` ինքը բերի փոփոխություն աշխարհին:
Կառույցն առաջիկայում նախատեսում է բացել 3 Թումո տուփ` Ստեփանակերտից հեռու գտնվող համայնքների պատանիների համար ևս կրթական ծրագիրը հասանելի դարձնելու համար: Այս դեպքում ուսանողներն ինքնուսուցման փուլն անցնելու են իրենց համայնքներում, իսկ դասընթացների և աշխատարանների համար գալու են Ստեփանակերտ:
Թումո ստեղծարար տեխնոլոգիաների Ստեփանակերտի կենտրոնի ղեկավար Արուսյակ Մարգարյանը հայրենիքի կանչով Նյու Յորքից տեղափոխվել է Արցախ և արդեն մի քանի շաբաթ է, ինչ Ստեփանակերտում է:
«Պատերազմից հետո, բնականաբար, կար որոշ ընկճվածություն, բայց, միաժամանակ, ուժեղացավ Արցախում մնալու, արարելու և արցախցի պատանիների համար արժանի ապագա ապահովելու հաստատակամությունը: Մենք վստահ ենք, որ կրթությունն ու կրթական ազատությունն այս գործում առաջնային դեր ունեն, հետևաբար, վստահ քայլերով իրականացնելու ենք մեր առաքելությունը, այն է` արցախցի յուրաքանչյուր պատանու հասանելի դարձնել ամենանորարար կրթությունը»,- շեշտեց նա:
