Երեկ՝ հուլիսի 9-ին, Ստեփանակերտ-Ասկերան ճանապարհի 8-րդ կիլոմետրին «Փարոս» հյուրանոցի մոտակայքում տեղի ունեցած ճանապարհատրանսպորտային պատահար (ՃՏՊ)-ի հետևանքով կան տուժածներ։
Ճանապարհատրանսպորտային պատահար Ստեփանակերտ-Ասկերան ճանապարհի 8-րդ կիլոմետրին. կան տուժածներ
ՍՏԵՓԱՆԱԿԵՐՏ, 10 հուլիսի, ԱՐՑԱԽՊՐԵՍ: Այս մասին «Արցախպրես»-ին տեղեկացրել են ԱՀ արտակարգ իրավիճակների պետական ծառայության տեղեկատվության և հասարակայնության կապերի բաժնից:
ՃՏՊ-ի հետևանքով իրար են բախվել Շուշի քաղաքի բնակիչ Առնոլդ Հովսեփյանի (1985թ) վարած «Ford Tranzit» 36 NN 698 պ/հ և Ասկերան քաղաքի բնակիչ Բորիս Դանիելյանի (2000 թ.) վարած «Volkswagen Golf» մակնիշի 32 OO 908 պ/հ ավտոմեքենաները:
ԱԻՊԾ փրկարարներին հաջողվել է վթարված ավտոմեքենաներից ժամանակին դուրս բերել տուժածներին և Ասկերանի ՀՓՄ-ի հրշեջ-փրկարարների հետ ցուցաբերել համապատասխան օգնություն:
ՃՏՊ-ի հետևանքով «Ford Tranzit» 36 NN 698 պ/հ ավտոմեքենայի տուժածներ՝ վարորդ Առնոլդ Հովսեփյանը տարբեր մարմնական վնասվածքներով շտապօգնության մեքենայով տեղափոխվել է Ստեփանակերտի «Հանրապետական բժշկական կենտրոն» ՓԲԸ, իսկ նույն մեքենայի ուղևոր Ստեփանակերտ քաղաքի բնակիչ Հայկ Սարգսյանը (2007 թ.) թեթև մարմնական վնասվածքներով՝ «Արևիկ» մանկական բուժմիավորում ՓԲԸ:
ՃՏՊ-ի հետևանքով «Volkswagen Golf» մակնիշի 32 OO 908 պ/հ ավտոմեքենայի տուժածներ՝ վարորդ Բորիս Դանիելյանը տարբեր մարմնական վնասվածքներով շտապօգնության մեքենայով տեղափոխվել է Ստեփանակերտի կենտրոնական զինվորական հոսպիտալ, իսկ նույն մեքենայի ուղևորներ Ասկերանի շրջանի Խնապատ համայնքի բնակիչ Վահե Ծատրյանը (2000թ.) և Ստեփանակերտ քաղաքի բնակիչ Արմեն Բաբայանը (1999թ.) տարբեր մարմնական վնասվածքներով շտապօգնության ավտոմեքենայով տեղափոխվել են «Հանրապետական բժշկական կենտրոն» ՓԲԸ:
Ըստ բժիշկներից ստացված տեղեկության (հուլիսի 10, ժամը՝ 10։50 տվյալներով)՝ տուժածներ Բորիս Դանիելյանի, Առնոլդ Հովսեփյանի և Արմեն Բաբայանի առողջական վիճակը գնահատվում է ծանր։ Վահե Ծատրյանի վիճակը՝ ծայրահեղ ծանր, Հայկ Սարգսյանի առողջական վիճակը գնահատվում է բավարար:
