ՍՏԵՓԱՆԱԿԵՐՏ, 30 հունիսի, ԱՐՑԱԽՊՐԵՍ։ «Արցախպրես»-ի  թղթակցի  հաղորդմամբ՝ նիստի  օրակարգում    ընդգրկված  էին   «Արցախգազ»   ՓԲ   ընկերության   կողմից  սպառողներին վաճառվող բնական  գազի  սակագները  սահմանելու,  «Ղարաբաղ   Տելեկոմ»   փակ   բաժնետիրական   ընկերությանը   տրամադրված    ռադիոհաճախականությունների  հատվածներում   մի   շարք    ռադիոհաճախականությունների       օգտագործման, «Հեղուկ   գազ»    ապրանքային    շուկայի   կառուցվածքի   ուսումնասիրության    արդյունքների    մասին և  այլ  հարցերը:

Նիստին ԱՀ  հանրային   ծառայությունները  և  տնտեսական  մրցակցությունը    կարգավորող  պետական    հանձնաժողովի   տնտեսական մրցակցության պաշտպանության բաժնի պետ Սերգեյ Գրիգորյանը  հեղուկ   գազի  ապրանքային շուկայի կառուցվածքային  ուսումնասիրությունից  բացի    ներկայացրել է  նաև   շուկայի  գնագոյացման  ուսումնասիրությունը, որի   արդյունքում   երկու   խոշոր   տնտեսվարող  սուբյեկտներ   հանձնաժողովի      կողմից     համարվել  են   գերիշխող  դիրք  ունեցող: 

Նիստին  ԱՀ  հանրային   ծառայությունները  և  տնտեսական  մրցակցությունը    կարգավորող  պետական    հանձնաժողովի  հանրային ծառայությունների կարգավորման վարչության պետի տեղակալ Աննա Առաքելյանն  իր   ելույթում    ասել է, որ   ինչպես արդեն հայտարարվել էր,    2019 թվականի սեպտեմբերի 6-ին Հայաստանի ու Արցախի կարգավորողների և հայկական երկու հանրապետությունների տարածքներում գործող 4 օպերատորների միջև ստորագրված փոխըմբռնման հուշագրով նախատեսվել էր ռոումինգ ծառայությունների սակագների փուլային նվազեցման գործընթաց, որի իրականացման արդյունքում 2020 թվականի հունվարի 1-ից զգալիորեն նվազեցվել էին ինչպես ռոումինգ ծառայությունների, այնպես էլ մի շարք ներցանցային ծառայությունների և դեպի Հայաստանի Հանրապետություն իրականացվող զանգերի սակագները:

 

«Նշված գործընթացի շրջանակներում ոումինգ ծառայությունների հաջորդ նվազեցումը տեղի կունենա այս  տարվա  հուլիսի 1-ից: Մասնավորապես՝ գործող սակագների համեմատ՝

-ելքային զանգերի սակագները ռոումինգում  նվազել են 3,4%-ով

-մուտքային զանգերի սակագները  ռոումինգում նվազել են 6,7%-ով

-տվյալների փոխանցման և ինտերնետ հասանելիության ծառայությունների սակագները ռոումինգում  նվազել են  22,7%-ով:

Զուգահեռաբար հանձնաժողովն սույն թվականի հուլիսի 1-ից հերթական անգամ նվազեցրել  է  նաև դեպի Հայաստանի Հանրապետություն իրականացվող զանգերի սակագները, հետվճարային բջջային հեռախոսակապի շարժական համացանցի թվաֆիկի մեկ միավորի սակագինը, ինչպես նաև բարելավել հետվճարային և կանխավճարային հեռախոսակապի շարժական համացանցի սակագնային փաթեթներում տրամադրվող պայմանները: Մասնավորապես՝ կավելացվի հետվճարային և կանխավճարային հեռախոսակապի շարժական համացանցի մի շարք սակագնային փաթեթներում տրամադրվող թրաֆիկի քանակը` փաթեթների անփոփոխ սակագների պայմաններում: Այսպիսով՝ 2020 թվականի հուլիսի 1-ից նշված ծառայությունների սակագների նվազեցման չափը, գործող սակագների համեմատ, կկազմի 3,4-25%՝ կախված ծառայության տեսակից, միջինացված տոկոսային արտահայտությամբ՝ 6,5 %-ով»,-մանրամասնել է  Ա.  Առաքելյանը:

 

Նիստի   վերջում   հանձնաժողովի  անդամները  և  մասնակիցները  հանդես  են  եկել  հարցադրումներով: