ՀՀ Ազգային ժողովում ընդգրկված 3 խմբակցությունների շուրջ 12 պատգամավորներ մարտի 31-ին կայացած համապետական ընտրություններին Արցախում իրականացրել են դիտորդական առաքելություն:
ՀՀ Ազգային ժողովի դիտորդական խումբը դրական է գնահատում Արցախում կայացած նախագահական և խորհրդարանական ընտրությունները
ՍՏԵՓԱՆԱԿԵՐՏ, 1 ապրիլի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ դիտորդական խումբն այսօր կայացած մամուլի ասուլիսի ընթացքում ամփոփել է արդյունքները:
Իր խոսքում ՀՀ Ազգային ժողովի փոխնախագահ Ալեն Սիմոնյանն ասել է, որ դրական է գնահատում Արցախում կայացած նախագահական և խորհրդարանական ընտրություններին:
«Բաժանվելով մի քանի խմբերի՝ մենք հասցրել ենք լինել տարբեր ընտրատեղամասերում և հնարավորություն ենք ունեցել ընդգրկել Արցախի բոլոր շրջանները: Կարևոր է արձանագրել այն բարձր մասնակցությունը, որը, ի հեճուկս տարբեր կանխատեսումների, Արցախի բնակչությունը ցույց տվեց: Իհարկե, կային խնդիրներ, որոնց շուրջ անելիքներ կան, սակայն կարելի է արձանագրել, որ այսօրվա տվյալներն արտացոլում են այն պատկերը, որն արցախցին ձևավորել է քվեարկության միջոցով»,- նշել է Ա. Սիմոնյանը:
Իր հերթին «Լուսավոր Հայաստան» խմբակցության պատգամավոր Անի Սամսոնյանն ասել է, որ ընտրությունների բարձր մասնակցությունը վկայությունն է այն բանի, որ արցախցիները կարևորում են իրենց քաղաքական իրավունքներն ու ազատությունները, արժևորում և զգում են պատասխանատվությունը սեփական իշխանության նկատմամբ, ինչն էլ ինքնորոշման համար շատ բարձր ցուցանիշ է:
«Ընտրական տեղամասերում հիմնականում հայտնաբերել ենք ընթացակարգային խախտումներ, որոնք ունեին ընդհանուր պատճառներ: Առաջին հերթին ԱՀ Կենտրոնական ընտրական հանձնաժողովը պետք է շարունակի ավելի ակտիվ աշխատել տեղամասային հանձնաժողովների անդամների հետ: Բացի դրանից, կան իրավական հարցեր, որոնք պետք է դեռևս քննարկվեն: Ընդհանուր առմամբ, պետք է նշեմ, որ ընտրությունները անցել են խաղաղ պայմաններում»,- նշել է Ա. Սամսոնյանը:
Իսկ «Բարգավաճ Հայաստան» խմբակցության պատգամավոր Անդրանիկ Ծառուկյանն ասել է, որ ԱՀ Կենտրոնական ընտրական հանձնաժողովի կողմից պատշաճ մակարդակով կազմակերպվել էին տեղամաս մարդկանց մուտքը: Նա նշել է, որ բոլոր տեղամասերում առկա էին ախտահանման միջոցներ և բժշկական պարագաներ:
«Այս ընտրությունները ցույց տվեցին, որ արցախցին վճռական է և հաստատակամ: Հուսով ենք՝ Արցախը զերծ կմնա կորոնավիրուսի համավարակից, և վերջապես կունենանք ձևավորվա իշխանություն, որն Արցախը կտանի զարգացման»,- ավելացրել է Ա. Ծառուկյանը:
Մամուլի ասուլիսին դիտորդական խումբը պատասխանել է նաև լրագրողների կողմից բարձրացված մի շարք հարցերին:
