Այսօր՝ փետրվարի 28-ին, Ստեփանակերտի քաղաքային հուշահամալիրում 32 տարի առաջ Սումգայիթ քաղաքում ազերիների կողմից իրականացված ոճրագործության հետևանքով անմեղ զոհերի հիշատակին իրենց հարգանքի տուրքն են մատուցել հարյուրավոր քաղաքացիներ:
Այսօր Սումգայիթյան ջարդերի 32-րդ տարելիցն է. հանրապետությունում կազմակերպվել են հիշատակի միջոցառումներ
ՍՏԵՓԱՆԱԿԵՐՏ, 28 փետրվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ԱՀ նախագահ Բակո Սահակյանը, ԱՀ Ազգային ժողովի նախագահ Աշոտ Ղուլյանը, պետական նախարար Գրիգորի Մարտիրոսյանը, բաձրաստիճան պետական այրեր, զինվորականներ և այլ կառույցների ներկայացուցիչներ ծաղիկներ և ծաղկեպսակ են տեղադրել Սումգայիթյան զոհերի հիշատակին կանգնեցված հուշաքարին:
Հայ առաքելական եկեղեցու Արցախի թեմի առաջնորդ Պարգև արքեպիսկոպոս Մարտիրոսյանի հանդիսապետությամբ տեղի է ունեցել հոգեհանգստյան արարողություն:
Նա իր խոսքում ասել է, որ 1988 թվականի փետրվարի 28-ին Սումգայիթում կազմակերպվել էր հայերի էթնիկական զտում. ոճրագործությունը նախապես ծրագրված էր: «Հայերին խոշտանգում էին այդ օրերին, զրկել էին կապի բոլոր միջոցները, և այդ ամենը մեկ նպատակ էր հետապնդում՝ կանխել Արցախյան շարժումը և վախեցնել հայ ժողովրդին: 20-րդ դարի ավարտին կրկին հայ ժողովուրդը ցեղասպանություն տեսավ, ունեցանք գաղթականներ, բայց մեր ժողովուրդը չշեղվեց իր ազատատենչ ու արդար պահանջից: Այնուհետև Գանձակում, Մինգիչավուրում, Բաքվում ևս կազմակերպվեցին ջարդեր, որից հետո՝ արցախյան շարժում: Հայ ժողովուրդը ստեղծեց հայոց բանակ, որպեսզի այլևս չկրկնվեն նման ցեղասպանությունները: Թուրքը դեռևս չի փոխել իր ձեռագիրը, նա մնացել է նույն հայտյաց, ցեղասպան ազգը»,-մասնավորապես ասել է Արցախի թեմի առաջնորդը:
ԱՀ փախստականների միության նախագահ Սարո Սարյանը մեզ հետ զրույցում ասել է, որ մինչ այսօր դեռևս ամբողջությամբ չեն լուծվել փախստականների սոցիալ-կենցաղային խնդիրները:
Խոսելով օրվա մասին՝ նա նշել է, որ ամեն անգամ մեծ ցավով ու կսկիծով են հուշահամալիր այցելում՝ հիշելով 1988 թվականին թուրքերի կազմակերպած դաժանություններն ու վայրագությունները հայ ժողովրդի նկատմամբ:
Նշենք, որ սումգայիթյան ոճրագործության 32-րդ տարելիցին նվիրված՝ հիշատակի միջոցառումներ են կազմակերպվել նաև Արցախի բոլոր շրջաններում:
