Այսօր՝ ժամը 19:00-ին, Ստեփանակերտի Վերածննդի հրապարակում տեղի է ունեցել է հանրապետության գլխավոր տոնածառի լույսերի վառման հանդիսավոր արարողությունը։
Վառվել են հանրապետության գլխավոր տոնածառի լույսերը
ՍՏԵՓԱՆԱԿԵՐՏ, 20 դեկտեմբերի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ տոնածառի լույսերի վառման պատիվը տրվել է Ստեփանակերտի նորընտիր քաղաքապետ Դավիթ Սարգսյանին:
Որին հաջորդել է շուրջ 500 դպրոցականների մասնակցությամբ ամանորյա ֆլեշ-մոբը, որին մասնակցել են նաև Ձմեռ Պապն ու Ձյունանուշը, մուլտհերոսները, ինչպես նաև 2020 թվականի խորհրդանիշ՝ սպիտակ առնետը: Միջոցառումն ուղեկցվում էր ամանորյա երգերով ուպարերով:
Ստեփանակերտի քաղաքապետարանի մշակույթի, երիտասարդության և զբոսաշրջության բաժնի պետ Կարինե Հարությունյանը մեզ հետ զրույցում ասել է, որ այս տարի մշակութային միջոցառումների ծրագրում մի շարք նորություններ են մտցվել, որպեսզի տոնական օրն էլ ավելի հետաքրքիր և գունեղ լինի:
«Այս գեղեցիկ ամենամյա միջոցառմամբ մենք մեկնարկեցինք գալիք՝ 2020 թվականի առթիվ նախաձեռնած տոնակատարությունների շարքը: Ի սրտե շնորհավորում եմ Արցախում, Մայր Հայաստանում և Սփյուռքում ապրող մեր հայրենակիցների գալիք Ամանորն ու Սուրբ Ծնունդը: Ցանականում եմ, որ Արցախ աշխարհում լինի հարատև խաղաղություն, հայկական օջախներում՝ ջերմություն, ներդաշնակություն, արևշատություն և առողջություն: Թո՛ղ 2020 թվականը բոլորի համար լինի բարի և նվիրական իղձերի և սպասումների իրականացման տարի»,-ավելացրել է Կ. Հարությունյանը:
Նա տեղեկացրել է, որ դեկտեմբերի 31-ին կազմակերպվելու է տոնական համերգ: Այդ օրը Ձմեռ Պապն ու Ձյունանուշը շրջելու են մայրաքաղաքով՝ շնորհավորեն քաղաքացիներին և նվերներ բաժանեն փոքրիկներին:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -35-:
