Այսօր՝ նոյեմբերի 17-ին, Շառլ Ազնավուրի անվան մշակույթի կենտրոնում տեղի է ունեցել «Վստահություն» կուսակցության հիմնադիր համագումարը:
«Վստահություն» կուսակցությունը հանդես է գալիս կառուցողական ընդդիմության դիրքերից.Գրիգորի Սահակյան
ՍՏԵՓԱՆԱԿԵՐՏ, 17 նոյեմբերի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ բաց քվեարկության արդյունքում հիմնադիր համագումարի նախագահ է ընտրվել Գրիգորի Սահակյանը: Ողջունելով ներկաներին՝ Գ.Սահակյանը բարի երթ ու արդյունավետ աշխատանք է մաղթել հիմնադիր համագումարի մասնակիցներին և շնորհակալություն հայտնել վստահության համար:
«Հարգելով գործող կուսակցությունների ծրագրերն ու գաղափարները, հաշվի առնելով ժամանակի պահանջը և հասարակությանը այլընտրանքի հնարավորություն տալու գերնպատակը, որոշում ենք կայացրել ստեղծել նոր՝ «Վստահություն» անունը կրող կուսակցություն՝ դավանելով ազգային պահպանողական գաղափարներ:Մեր գաղափարախոսության առանցքն է պատմականորեն ձևավորված հիմնարար արժեքների ու բարոյական նորմերի պահպանումը: Մեր նպատակն անցյալում ստեղծվածը, հղկվածը, ժամանակի փորձությունները հաղթահարածը և արժեհամակարգ դարձածը սերնդեսերունդ փոխանցելն է: «Վստահություն» կուսակցությունը հանդես է գալիս կառուցողական ընդդիմության դիրքերից և պատրաստ է համագործակցել բոլոր այն քաղաքական ուժերի հետ, որոնք ցանկություն ունեն որդեգրելու նոր աշխատաոճ, միավորվելու հանուն ընդհանուր նպատակների:Կուսակցությունը ներկայացնում է ազատ արցախցուն, ով սիրում է իր երկիրն ու մշակույթը, ով պատրաստ է զարգանալ՝ զարգացնելով իր երկիրը, ով հավատում է իր երկրի ապագային և պատրաստ է պաշտպանել երկրի ու այդ երկրում ապրող իր երեխաների անվտանգությունը, ով պատրաստ է պայքարել սեփական երկրում արժանապատիվ աշխատանքի, կյանքի և ուսման հնարավորություն ունենալու համար, ով նպատակ ունի իր պապենական օջախում սերունդների համար աներկյուղ ապագա կառուցել:Մեր ապրած պատմական ժամանակաշրջանը մեզ հնարավորություն է տալիս հավաքվելու մեր պետության առանցքի շուրջ և հզորացնելու մեր երկիրը:Իր ծրագրային դրույթները կյանքի կչելու համար կուսակցությունը հայցում է հասարակության լայն շրջանակների վստահության քվեն»,-մասնավորապես ասել է նա:
««Որոշում» քաղաքացիական նախաձեռնություն» հասարակական կազմակերպության նախագահ, համագումարի պատվիրակ Արթուր Հայրապետյանն իր ելույթում մասնավորապես ասել է. «Մենք վստահ ենք, որ հաշվի առնելով արդի ներքաղաքական և արտաքին քաղաքական իրադարձությունները և դրանցով պայմանավորված ներհանրապետական հասարակական, քաղաքական վիճակը՝ այսօր անհրաժետություն կա ստեղծելու մի քաղաքական միավորում, որն ունակ կլինի հանդես գալ Արցախի ազգային-պահպպանողական ուժերի ընդգծված դիրքում:
««Որոշում» քաղաքացիական նախաձեռնություն» և «Առաջ Արցախ» հասարակական կազմակերպություններն արդեն տևական ժամանակ է ինչ գործունեություն են ծավալում Արցախում: Այս կազմակերպությունների ակտիվ գործունեության շնորհիվ ունենք մեծ թվով համակիրներ ու անդամներ: Կազմակերպություններն իրենց գործունեության թիրախ են ընտրել պահպանել ազգայինը: Հանրությունը պետք է գիտակցի, որ չափազանց մեծ գնով ազատագրված երկիրը պետք է առաջ տանել ճիշտ գաղափարների և արժեքների քարոզմամբ ու կիրառմամբ:Մեր գործունեության ընթացքում հանդիպել ենք նաև գաղափարակից ընկերների, որոնց թվում են այսօր Վստահություն կոււսակցության շարքերում ընդգրկվող անձինք: Դա նույնպես իրար է մոտեցրել մեր կազմակերպություններն ու կուսակցությունը: Հենց գաղափարակից լինելու հանգամանքն է նպաստել, որպեսզի մեր մասնակցությունը բերենք «Վստահություն» կուսակցության ծրագրի մշակմանն ու կուսակցաշինարարական գործընթացին: Վստահ եմ, որ միավորելով մեր ներուժն ու հնարավորությունները կարող ենք ավելի համակարգված և կազմակերպված գործել՝ ի շահ արցախցու, ի շահ Արցախի Հանրապետության: Մենք մեծ պատրաստակամություն ենք հայտնում համատեղ առաջ ընթանալ՝ ի կատարոււմն կուսակցության հռչակած նպատակների»:
Արթուր Հայրապետյանն օգտվելով առիթից շնորհավորել է ուսանողներին՝ միջազգային տոն օրվա կապակցությամբ և նշել, որ ներկայիս քաղաքական ու հասարակական ոլորտներում ուսանողներն ունեն իրենց մեծ դերն ու նշանակությունը:
Համագումարին ելույթներով հանդես են եկել նաև նախաձեռնող խմբի անդամներ, համագումարի պատվիրակներ և այլք:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -23-:
