ՍՏԵՓԱՆԱԿԵՐՏ, 15 նոյեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ներկայացնելով տարեկան գործունեության ծրագիրը՝ ԱՀ Հանրային ծառայությունները և տնտեսական մրցակցությունը կարգավորող պետական hանձնաժողովի աշխատակազմի գլխավոր մասնագետ, քարտուղար Ելենա Գաբրիելյանն ասել է, որ այն ծրագրի նպատակն է 2020 թ.-ին շարունակել և զարգացնել կարգավորման գործառույթը՝ կոչված պաշտպանելու և հավասարակշռելու սպառողների ու հանրային ծառայությունների և տնտեսական մրցակցության ոլորտում կարգավորվող գործունեություն իրականացնող անձանց շահերը, կարգավորվող անձանց համար ստեղծելու գործունեության միատեսակ պայմաններ, նպաստելու մրցակցային շուկաների ձևավորմանն ու զարգացմանը, խթանելու ռեսուրսների արդյունավետ օգտագործումը:

Ներկայացնելով էներգետիկայի բնագավառը՝ Ե. Գաբրիելյանը նշել է, որ 2020 թ.-ին նախատեսվում է իրականացնել իրավական մի շարք բարեփոխումներ, այդ թվում՝ հանձնաժողովը օրենսդրական փոփոխությունների միջոցով ձեռնամուխ կլինի սակագնի հաշվարկի տարր կազմող ցուցանիշների հաշվարկման մեթոդիկաների մշակմանը:

Սակագնային քաղաքականության ոլորտում հանձնաժողովը նախատեսում է շարունակել էներգետիկայի բնագավառում էներգետիկ հաշվեկշիռների, կարգավորվող ընկերությունների կողմից լիցենզավորված գործունեության իրականացման համար անհրաժեշտ ծախսերի ու պարտավորությունների, կատարված ներդրումների և սակագների վրա ազդող մի շարք այլ գործոնների վերլուծության և, ըստ անհրաժեշտության, սակագների վերանայման աշխատանքները:

Ե. Գաբրիելյանի խոսքով՝ գալիք տարում կանխատեսվում են նոր ներդրումներ, որոնց արդյունքում  Արցախի տարածքում կկառուցվի էլեկտրական էներգիա արտադրող 7 նոր կայան, այդ թվում՝ 6 ՓՀԷԿ և 1 արևային կայան՝ մոտավորապես 30 ՄՎտ դրվածքային հզորությամբ և տարեկան 150 մլն կՎտ/ժ էլեկտրական էներգիայի արտադրությամբ:

Հեռահաղորդակցության բնագավառում 2020 թ.-ին հանձնաժողովը շարունակելու է նշված բնագավառում մատուցվող ծառայությունների հասանելիության աշխարհագրության ընդլայնման և մատչելիության ապահովման, բաժանորդների իրավունքների և շահերի պաշտպանության, ինչպես նաև գործարար միջավայրի բարելավման ուղղությամբ իրականացվող աշխատանքները:

Գալիք տարում հանձնաժողովը ուշադրության կենտրոնում կպահի լայնաշերտ (արագագործ) ինտերնետ հասանելիության ծառայությունների բարելավման հարցը, ինչի համար կիրականացվեն արագագործ ինտերնետային ծառայություններ մատուցելու հնարավորությունների մեծացմանը նպաստելուն ուղղված քայլեր:

Ե. Գաբրիելյանը հաջորդիվ անդրադարձել է մնացած այլ ոլորտներին՝ ընդգծելով, որ հանձնաժողովի 2020 թ.-ի գործունեության ծրագրի նախագիծը հանրային քննարկման նպատակով հրապարակվել է Հանձնաժողովի պաշտոնական ինտերնետային կայքում, ինչպես նաև համապատասխան գրություններով ուղարկվել հանրային ծառայությունների ոլորտի կարգավորվող ընկերություններին: Ծրագրի նախագծի վերաբերյալ ներկայացված առաջարկությունները քննարկվել և ներառվել են ծրագրում:

Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -47-: