ԱՀ կառավարության նիստին՝ ԱՀ ոստիկանապետ Լևոն Մնացականյանը ներկայացրել է «Արցախի Հանրապետության ոստիկանության կողմից հանցագործությունների, վարչական իրավախախտումների, պատահարների վերաբերյալ հաղորդումներն ընդունելու, գրանցելու, հաշվառելու և դրանց ընթացք տալու կարգը սահմանելու մասին» Արցախի Հանրապետության կառավարության որոշման ընդունման հիմնավորումը:
Գործադիրը հավանություն է տվել ԱՀ ոստիկանության կողմից հանցագործությունների, վարչական իրավախախտումների, պատահարների վերաբերյալ հաղորդումներն ընդունելու, գրանցելու, հաշվառելու և դրանց ընթացք տալու կարգը սահմանելու մասին նախագծին
ՍՏԵՓԱՆԱԿԵՐՏ, 15 նոյեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ Լ. Մնացականյանն ասել է, որ «Ոստիկանության մասին» օրենքի 11-րդ հոդվածի 2-րդ մասի համաձայն` ոստիկանությունը պարտավոր է Արցախի Հանրապետության կառավարության սահմանած կարգով ընդունել, գրանցել և հաշվառել հանցագործությունների ու այլ իրավախախտումների, պատահարների վերաբերյալ դիմումներն ու հաղորդումները, դրանց տալ համապատասխան ընթացք:
Նրա խոսքով՝ նախագծով՝ իրավական հիմքեր են ստեղծվում 2022 թվականից հաղորդումների գրառման էլեկտրոնային բազա ստեղծելու համար, վերացվում են խորհրդային տարիներից «ժառանգություն» մնացած թիվ 2 մատյանները, քաղաքացիներին հնարավորություն է ընձեռնվում իրավախախտումների և պատահարների վերաբերյալ հաղորդումներ ներկայացնելու նաև էլեկտրոնային եղանակով, ինչի համար սահմանվում է պաշտոնական էլեկտրոնային հասցե՝ dimum@police.nkr.am:
Նախատեսվում են նաև քաղաքացիների իրավական իրազեկմանը նպաստող մեխանիզմներ: «Խոսքը, մասնավորապես, կտրոն-ծանուցագրերի մասին է, որը ներառում է նաև օրինականության նկատմամբ ներգերատեսչական հսկողություն իրականացնող ոստիկանության վերադաս ստորաբաժանման տվյալները, այդ թվում՝ հեռախոսահամարը: Նախագիծը նպատակ ունի կարգավորել ոստիկանության կողմից հանցագործությունների, վարչական իրավախախտումների և պատահարների վերաբերյալ հաղորդումներն ընդունելու, գրանցելու, հաշվառելու և դրանց ընթացք տալու հետ կապված հարաբերությունները:
Որոշման ընդունման կապակցությամբ անհրաժեշտություն կառաջանա Արցախի Հանրապետության ոստիկանության պետի հրամանով սահմանել որոշման պահանջների կատարման նկատմամբ ներգերատեսչական հսկողության կարգը: Որոշման ընդունմամբ՝ պետական բյուջեում ծախսերի և եկամուտների էական ավելացում կամ նվազեցում չի նախատեսվում»,-ավելացրել է Լ. Մնացականյանը: