ՍՏԵՓԱՆԱԿԵՐՏ, 27 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` այս մասին նախօրեին Խորհրդարանում կայացած օրենսդիր-գործադիր հարցուպատասխանի ժամանակ ասել է ԱՀ քաղաքաշինության նախարար Կարեն Շահրամանյանը:

 

Նախարարի խոսքով` ըստ կառավարության որոշման՝ տվյալ ընտանիքների բնակարանային պայմանների բարելավման ծրագրի ավարտը նախատեսվում է 2021 թ.-ի դեկտեմբեր ամիսը: Խոսքը վերաբերում է 400 բազմազավակ ընտանիքներին, որոնք ունեն 5 և ավելի երեխաներ:

 

«Ներկայումս մենք գրավոր դիմել ենք շրջանի վարչակազմերին, որպեսզի ըստ առաջնահերթության ներկայացնեն բազմազավակ ընտանիքների ցանկերը: Ըստ ներկայացված ցանկերի` մեր կողմից մեկնարկելու են բնակարանների տեղակայման աշխատանքները և անհրաժեշտ միջոցներ կհատկացվեն 2020 թ.-ի պետական բյուջեով, որպեսզի աշխատանքները մինչև 2021 թ. հասցվեն ավարտին»,- մանրամասնել է Կ. Շահրամանյանը:

 

«Հայրենիք» խմբակցության պատգամավոր Ռոբերտ Ղահրամանյանը հարցուպատասխանի ժամանակ մասնավորապես անդրադարձել էր Ասկերանի շրջանի Սղնախ համայնքի բնակիչ Վարդան Հայրիյանի բնակարանային խնդրին:

Պատգամավորը նշել է, որ Վարդան Հայրիյանը 5 անչափահաս երեխաների հետ բնակվում է վթարային տան: Հարցի կապակցությամբ գրավոր դիմում է ներկայացվել քաղաքաշինության նախարարին՝ կից ներկայացնելով Վարդան Հայրիյանի խնդրանք-դիմումը, որտեղ նկարագրված է բնակարանի վթարային պայմանները, որը գտնվում է փլուզման փուլում և կարող է առաջացնել ծանր հետևանքներ ընտանիքի անդամների համար: Առ այսօր խնդիրը համարվում է չլուծված:

 

Հարցի կապակցությամբ քաղաքաշինության նախարարը նշել է, որ Վ. Հայրիյանի բնակարանային խնդիրը լուծելու համար առայժմ կդիմեն Ասկերանի շրջվարչակազմի ղեկավարին`հնարավորության սահմանում գյուղում վարձակալության հիմունքներով այլ բնակարան տեղափոխվելու մինչև հարցը վերջնական լուծում կստանա:

Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -24-: