Artsakhpress

Տնտեսական

Ֆրանսիական խոշորագույն ընկերության համար Հայաստանը մեծ շուկա է. Thales-ն ամփոփել է այցի արդյունքները

Տեխնոլոգիական առաջատար «Thales Group» ֆրանսիական խոշորագույն ընկերությունը շարունակում է ուսումնասիրել Հայաստանը՝ ուրվագծելով այն ուղղությունները, որոնցով առաջիկայում հնարավոր է հիմք դնել հայ-ֆրանսիական նոր համագործակցության:

Ֆրանսիական խոշորագույն ընկերության համար Հայաստանը մեծ շուկա է. Thales-ն ամփոփել է այցի արդյունքները

Ֆրանսիական խոշորագույն ընկերության համար Հայաստանը մեծ շուկա է. Thales-ն ամփոփել է այցի արդյունքները
ՍՏԵՓԱՆԱԿԵՐՏ, 6 սեպտեմբերի, ԱՐՑԱԽՊՐԵՍ-ԱՐՄԵՆՊՐԵՍ: Հենց այս նպատակով Հայաստանի Հանրապետության նախագահ Արմեն Սարգսյանի հրավերով կրկին Հայաստան էր այցելել «Thales Group»-ի պատվիրակությունը՝ այս անգամ ավելի մեծ և ներկայացուցչական կազմով. մեր երկրում էին ընկերության ռազմավարության և համագործակցության հարցերով փոխնախագահ Ֆիլիպ Վալերին, վաճառքի և մարկետինգի հարցերով փոխնախագահ Ժերոմ Սիոնը, բիզնեսի զարգացման հարցերով տնօրեն Ալեքսանդր Գոդլևսկին և փոխնախագահ, տարածաշրջանային տնօրեն Պոլ Ռեմին:
Այցի մի քանի օրերի ընթացքում ընկերության ղեկավար կազմի ներկայացուցիչները հասցրել են հանդիպումներ ունենալ ՀՀ կառավարության ներկայացուցիչների, այդ թվում և կրթության, գիտության, մշակույթի և սպորտի նախարար Արայիկ Հարությունյանի, էկոնոմիկայի նախարար Տիգրան Խաչատրյանի, բարձր տեխնոլոգիական արդյունաբերության փոխնախարար Գեղամ Վարդանյանի հետ,  այցելել են առաջատար տեխնոլոգիական ընկերություններ, մասնավորապես՝ «Սինոփսիս Արմենիա» ընկերություն, BetConstruct ընկերություն, ԹՈՒՄՈ ստեղծարար տեխնոլոգիաների կենտրոն, հանդիպել հայկական ստարտափների ներկայացուցիչների հետ, ուսումնասիրել բարձր տեխնոլոգիաների ոլորտում հայաստանյան փորձառությունը:
Այցի ավարտին ընկերության փոխնախագահ, տարածաշրջանային տնօրեն Պոլ Ռեմին, ով արդեն երրորդ անգամ էր Հայաստանում, լրագրողների հետ զրույցում նշեց, որ այցը խիստ կարևոր էր: «Մեր այցի նպատակը Հայաստանի և Thales-ի միջև ստեղծված աշխատանքային խմբի շրջանակում հնարավորինս շատ տեղեկատվություն հավաքելն է՝ հստակեցնելու այն պոտենցիալ ուղղությունները, որոնցով կարող ենք ներկայություն ունենալ ձեր երկրում»,- նշեց նա:
Անդրադառնալով հարցին, թե արդյոք կան արդեն իսկ ձեռք բերված հստակ պայմանավորվածություններ՝ Պոլ Ռեմին նշեց, որ դրանց մասին փոքր-ինչ վաղ է խոսել: «Համագործակցության շատ լավ հեռանկարներ կան: Մենք շատ խոշոր ընկերություն ենք և չենք ցանկանում պարզապես խոստումներ տալ: Մեր նպատակն է հասնել շոշափելի արդյունքների: Այո, ունենք մտադրություն՝ բարձր տեխնոլոգիաների ոլորտում  համագործակցելու հայկական էկոհամակարգի հետ: Սակայն պետք է լրջորեն աշխատենք՝ հստակեցնելու իրական և շոշափելի ուղղությունները»,- նշեց նա: Որպես համագործակցության մեծ ներուժ ունեցող ուղղություն՝ Ռեմին մասնավորապես առանձնացրեց արհեստական բանականության ոլորտը:
Նրա համոզմամբ՝ Հայաստանը հարուստ է ռեսուրսներով: «Որպես բարձր տեխնոլոգիական ընկերություն՝ մենք Հայաստանը դիտարկում ենք որպես մեծ շուկա: Հայաստանը փոքր երկիր է, սակայն ունի շատ հզոր կրթական ու տեխնոլոգիական հիմքեր, իսկ Thales-ի նման ընկերության համար դա մեծ առավելություն է»,- ընդգծեց Ռեմին՝ հավելելով, որ առաջիկայում այցերը Հայաստան շարունակական կլինեն:
«Thales Group» ընկերությունը գործունեություն է ծավալում աշխարհի տարբեր երկրներում և զբաղվում էլեկտրական համակարգերի նախագծմամբ ու կառուցմամբ, ծառայություններ ապահովում ավիացիոն-տիեզերական, պաշտպանական, տրանսպորտային և անվտանգության շուկաներում:
Ֆրանսիական և եվրոպական տեխնոլոգիական առաջատար այս ընկերության հետ համագործակցության հիմքերը դրվել էին դեռ 2018 թվականի սեպտեմբերին, երբ Հայաստանի նախագահ Արմեն Սարգսյանը Ֆրանսիա կատարած այցի շրջանակում հանդիպումներ էր ունեցել «Thales Group» -ի ղեկավարության հետ, իսկ 2018 թվականի նոյեմբերին այցելել էր ընկերության թվային արտադրամաս ու ծանոթացել գործունեությանը և ընթացիկ ծրագրերին, քննարկել հայաստանյան ընկերությունների հետ հնարավոր համագործակցության ուղղություններին վերաբերող հարցեր։ Հանրապետության նախագահի հետ ձեռք բերված պայմանավորվածությունների արդյունքում ընկերության բարձրաստիճան պատվիրակությունն այս տարվա հունիսին Դիլիջանում մասնակցեց «Մտքերի հայկական գագաթնաժողով»-ին:
Արդեն 2019 թվականի հունիսին Արմեն Սարգսյանը Լը Բուրժեում անցկացվող Փարիզի միջազգային ավիացիոն ցուցահանդեսի շրջանակում այցելել էր «Thales Group»-ի  տաղավար և հանդիպել ընկերության նախագահ Պատրիս Քեյնի հետ: Հենց այստեղ էլ պայմանավորվածություն էր ձեռք բերվել «Thales Group»-ի ներկայացուցիչների այցը Հայաստան կազմակերպելու, ինչպես նաև փոխգործակցության կոնկրետ ուղղությունների վերաբերյալ արդեն իսկ պատրաստված համապատասխան փաստաթուղթն ուսումնասիրելու նպատակով աշխատանքային խմբեր ստեղծելու վերաբերյալ:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -18-:

     

Քաղաքական

Տնտեսական

Հասարակական

Ռազմական

Ամենադիտված

ամիս

շաբաթ

օր

ԱՄՆ-ից ժամանած բժիշկները Ստեփանակերտի բուժմիավորումներում կիրականացնեն հետազոտություններ և վիրահատություններ

Քաշաթաղում հայտնաբերել են հրազենային վնասվածքներով 27-ամյա երիտասարդի դի

Մանրամասներ Արագած լեռան վրա արջի հարձակման հետևանքով մահացած լեհ լեռնագնացի մասին. SHANTNEWS.am

Երևանի պետական բժշկական համալսարանում սովորում են 175 արցախցի ուսանողներ. Արմեն Մուրադյան

Ստեփանակերտի որոշ փողոցներում ժամանակավորապես կդադարեցվի գազամատակարարումը

Բացառիկ զորավարժություն, որին ներգրավված կլինեն ողջ երկիրն ու յուրաքանչյուրը․ ՀՀ ՊՆ

ՀՀ ԱԱԾ տնօրեն Արթուր Վանեցյանը հրաժարականի դիմում է ներկայացրել

Վանեցյանն անդրադարձել է իր հրաժարականին և հետագա անելիքներին

Բակո Սահակյանը հրավիրել է աշխատանքային խորհրդակցություն

Search