Ստեփանակերտի «Վալեքս Գարդեն» հյուրանոցային համալիրում այսօր կայացել է «Ինքնություն և միասնություն» կուսակցության հիմնադիր համագումարը:
Ստեփանակերտում կայացել է «Ինքնություն և միասնություն» կուսակցության հիմնադիր համագումարը
ՍՏԵՓԱՆԱԿԵՐՏ, 6 ապրիլի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ բացման խոսքով հանդես է եկել կուսակցության նախաձեռնող խմբի անդամ Արայիկ Ավանեսյանը, ով իր ելույթում մասնավորապես նշել է, որ կուսակցության ծրագրերը կառուցողական են և հայրենանվեր:
«Լինելով ազգային ավանդույթներին, հոգևոր արժեքներին հավատարիմ և պատշաճ աշխատանքային փորձ և ունակություններ ունեցող անդամներ՝ մենք մեր պատրաստակամությունն ենք հայտնում լծվելու Արցախի ամրապնդման ու զարգացման գործին: Մեր գործունեության մեջ պարտավորվում ենք լինել հետևողական, վճռական, միևնույն ժամանակ կշռադատված: Մեր հիմնական սկզբունքները կլինեն հայոց պետականության, հայ ժողովրդի ինքնիշխանության և անվտանգության ապահովումը, Արցախի հանրապետության՝ որպես միջազգային հարաբերությունների լիիրավ սուբյեկտի միջազգային իրավական ճանաչումը, որին կհաջորդի վերամիավորումը Մայր Հայաստանին, ինչպես նաև Հայաստան- Արցախ- Սփյուռք միասնական ներուժի իրագործումն՝ ի շահ հայ ժողովրդի և հայոց պետականության»,- մասնավորապես ասել է նա:
Մեզ հետ զրույցում «Ինքնություն և միասնություն» կուսակցության նախաձեռնող խմբի անդամ Տիգրան Գաբրիելյանը մասնավորապես նշել է, որ նրանք մասնակցելու են բոլոր քաղաքական գործընթացներին, բայց թե ինչ ֆորմատով, պարզ կլինի առաջիկայում:
