ԱՀ մշակույթի, երիտասարդության հարցերի և զբոսաշրջության նախարարության նախաձեռնությամբ այսօր Ստեփանակերտի մշակույթի և երիտասարդության պալատում տեղի է ունեցել ԼՂՀ Գերագույն խորհրդի առաջին նախագահ Արթուր Մկրտչյանի ծննդյան 60-ամյակին նվիրված ցուցահանդես և հուշ երեկո:
Ստեփանակերտում կազմակերպվել է միջոցառում՝ նվիրված Արթուր Մկրտչյանի ծննդյան 60-ամյակին (լուսանկարներ)
ՍՏԵՓԱՆԱԿԵՐՏ, 18 փետրվարի, ԱՐՑԱԽՊՐԵՍ:«Արցախպրես»-ի թղթակցի հաղորդմամբ՝ ցուցահանդեսին ներկայացված էր Արթուր Մկրտչյանի կյանքին և գործունեությանը վերաբերող լուսանկարներ, փաստաթղթեր, գրքեր, անձնական իրեր:
Ցուցահանդեսին ԱՀ մշակույթի, երիտասարդության հարցերի և զբոսաշրջության փոխնախարար Մելանյա Բալայանն ասել է, որ ման միջոցառումներով հայ ժողովուրդը վերարժևորում և երախտիքի տուրք է մատուցում ազգային պետականության հիմնասյուներից մեկին՝ Արթուր Մկրտչյանին:
Նա Ա. Մկրտչյանին բնութագրել է այսպես. «Հետևողականություն և վճռականություն, ազնվություն և հայրենասիրություն,շրջահայացություն և խորիմացություն. մարդկային կերպարին հարիր գերադրական հատկանիշներով էր օժտված Արցախի առաջին պետական ղեկավարն ու հիմնադիրը»:
Հուշ երեկոյին ԱՀ Ազգային Ժողովի նախագահ Աշոտ Ղուլյանը, խոսելով Ա. Մկրտչյանի մասին, ասել է, որ նա ընդամենը 33 տարեկան էր, երբ ստանձնեց երկրի փաստացի ղեկավարի՝ Գերագույն խորհրդի առաջին նախագահի պաշտոնը:«Չնայած իր երիտասարդ տարիքին՝ նա առանձնացավ իր պետական մտածողությամբ, ու թեև պաշտոնավարեց շատ կարճ ու կյանքից էլ հեռացավ վաղաժամ, բայց ժամանակակիցների և սերունդների հիշողության մեջ մնաց որպես առաջնորդ, ում համար պետական շահն առաջնային էր, և ով քաղաքականության մեջ պահպանեց մարդկային և բարոյական դիմագիծը»,-մասնավորապես նշել է Ա. Ղուլյանը:
ՀՅԴ Կենտրոնական կոմիտեի ներկայացուցիչ, ԱՀ Ազգային ժողովի «Դաշնակցություն» խմբակցության պատգամավոր Դավիթ Իշխանյանն էլ նշել է. «Արթուր Մկրտչյանը մեր ժողովրդի համար ամենածանր ժամանակներում չխուսափեց իր ուսերին կրել պատասխանատվություն՝ համոզված լինելով, որ բոլորը կառաջնորդվեն իր նման անաղարտ զգացումներով, չպատկերացնելով նույնիսկ իր նկատմամբ հնարավոր խափանարար քայլերի մասին, որ կարող էին ձեռնարկել իր երբեմնի թիմակցներն ու ազատագրական պայքարի առաջնորդներ հռչակվածները՝ չգիտակցելով, որ դա ուղղված է նորանկախ Արցախի պետության դեմ: Մենք պետք է խոսենք հրապարակախոս և իր ունկնդիրների սիրտը շահած Արթուրի մասին, այն փոքրամարմին, բայց մեծ ոգու տեր մարդու, որ խորհրդային և համայնավարական մտածելակերպ ունեցող մասսաների մեջ իր խոսքով կարողացավ արթնացնել ազգային պատականելիության ու ազատագրական պայքարին պատրաստ ոգին՝ շահելով նրանց վստահությունը»:
Երեկոյին՝ Արթուր Մկրտչյանի կինը՝ Գոհարը ներկաների հետ կիսվել է ամուսնու մասին հիշողություններով: Նա իր խոսքում ընդգծել է, որ Արթուրը եղել է հայրենապաշտ. հանուն հայրենիքի անկախության և ազատության նա պատրաստ էր ամեն զոհողության:
Արթուրի եղբայր Ղարիբ Բադասյանն էլ ասել է, որ Արթուրն ազնիվ ու պայծառ մարդ էր:«Նա ազատամարտիկ էր, քաղաքական գործիչ, գիտնական: Նա ոչ միայն Գերագույն խորհրդի նախագահն էր, այլ մեր նորաստեղծ հանրապետության, ինչպես նաև մարդկային տեսակի զուլալության և անաղարտության խորհրդանիշը: Նրա անցած կյանքը նվիրումի օրինակ է եղել մեզ համար: Արթուրը կարճ ապրեց, բայց արդյունավետ ապրեց: Նա իր մարդկային վեհ տեսակով հավերժ կապրի բոլորի սրտերում»,-նշել է Ղ. Բադասյանը:
Հուշ-երեկոյին ելույթներով և հիշողություններով հանդես են եկել նաև Արթուր Մկրտչյանի հարազատաները, մտերիմները, ընկերները: Միջոցառումն ընդմիջվում էր երաժշտական կատարումներով:
Միջոցառմանը ներկա էին ԱՀ նախագահ Բակո Սահակյանը, Արցախի թեմի առաջնորդ Պարգև Արքեպիսկոպոս Մարտիրոսյանը, պետական այրեր, հյուրեր և այլք:
