Artsakhpress

Քաղաքական

Մադրիդյա՞ն սկզբունքներն են սեղանին դրված, թե՞ կազանյան. Արթուր Թովմասյան

Բանակցությունների այլընտրանքը պատերազմն է. այս ճշմարտությունից ելնելով Արցախի խորհրդարանի իշխող «Հայրենիք» խմբակցության ղեկավար Արթուր Թովմասյանը ողջունում է Հայաստանի եւ Ադրբեջանի արտաքին քաղաքական գերատեսչությունների ղեկավարների վերջին երկարատեւ հանդիպումները եւ բանակցային գործընթացը վերսկսելուն ուղղված ԵԱՀԿ Մինսկի խմբի համանախագահների ջանքերը:

Մադրիդյա՞ն սկզբունքներն են սեղանին դրված, թե՞ կազանյան. Արթուր Թովմասյան

Մադրիդյա՞ն սկզբունքներն են սեղանին դրված, թե՞ կազանյան. Արթուր Թովմասյան

ՍՏԵՓԱՆԱԿԵՐՏ, 20 հունվարի, ԱՐՑԱԽՊՐԵՍ: Մեր զրուցակիցը հիշեցնում է`այն պահից, երբ Արցախը բանակցային գործընթացից դուրս մնաց, Արցախի իշխանությունները ողջունել են ՀՀ եւ Ադրբեջանի ղեկավարների`տարբեր ձեւաչափերով ընթացող բանակցությունները` ԵԱՀԿ Մինսկի խմբի հովանու ներքո`հստակեցնելով. «Միայն այն մասով, որ ոչ մի հիմնարար փաստաթուղթ չպետք է ստորագրվի: Մենք ողջունել ենք բանակցություն-գործողությունների հումանիտար բնույթը`դիակների փոխանակում, գերիների փոխանակում, դիպուկահարների ետ քաշում առաջնագծից, կրակոցների քչացում եւ այլն: Քանիցս ասել ենք, հիմա էլ կրկնում եմ`Արցախի հիմնախնդրի լուծման բանալին գտնվում է ոչ թե Բաքվում, ոչ թե Երեւանում, այլ Ստեփանակերտում եւ ինչքան շուտ սա հասկանան ԵԱՀԿ Մինսկի խմբի համանախագահողներն, այնքան հարցի լուծումը կմոտեցնեն», գրում է aravot.am լրատվական կայքը:

Արթուր Թովմասյանն այն համոզման է, որ 2016 թվականի ապրիլյան պատերազմը հարցի լուծումը ավելի ետ տարավ. «Որովհետեւ, իմ խորին համոզմամբ, Արցախի հիմնախնդրի լուծումը հնարավոր է միայն փոխվստահության պայմաններում: Այսօր փոխվստահության մթնոլորտ, ես չէի ասի, որ կա, թեկուզ լավատեսական հայտարարություններ են հնչում: Ես չէի ասի, որ փոխվստահության մթնոլորտ կա Հայաստանի վարչապետ Նիկոլ Փաշինյանի եւ Ադրբեջանի նախագահ Իլհամ Ալիեւի միջեւ»:

Էլմար Մամեդյարով-Զոհրաբ Մնացականյան վերջին հանդիպումը տեղի ունեցավ հունվարի 16-ին: Հանդիպումը տեւեց չորս ժամ, հետո, տարածված հայտարարության մեջ լավատեսական շեշտադրումներ էին: Արթուր Թովմասյանն ասում է. «Արտգործնախարարների գործը ոչ միայն լավատեսություն ներշնչելն է, այլ նրանք պետք է հող պատրաստեն երկրի ղեկավարների հանդիպման համար: Բայց հիմնախնդիրն անհնար է լուծել, որովհետեւ ՀՀ առաջնորդը ժողովրդավարական ճանապարհով իշխանության եկած առաջնորդ է, վայելում է ժողովրդի վստահությունը, իսկ Ադրբեջանում նստած է բռնապետ:

Սա փաստում են նաեւ բազմաթիվ միջազգային դիտորդներ, ովքեր մասնակցել են թե Հայաստանում, թե Ադրբեջանում կայացած համապետական ընտրություններին: Իմ խորին համոզմամբ, Արցախի խնդրի լուծումը կմոտենա այն դեպքում, երդ Ադրբեջանում եւս ժողովրդավարական ուժեր գան իշխանության: Ժողովրդի վստահությունը վայելող առաջնորդները միայն կարող են ինչ-որ տարբերակ առաջարկել ժողովրդին»: Այս համատեքստում, մեր զրուցակիցը հիշեցնում է Նիկոլ Փաշինյանի`քանիցս արած հայտարարություններն այն մասին, որ ինքը Արցախի հարցը միանձնյա չի լուծելու, այլ եթե կլինի ինչ-որ տարբերակ, ինքը դա կառաջադրի հասարակության դատին:

«Առավոտի» հարցին`արդյոք երկու երկրների ղեկավարների միջեւ փոխվստահության մասին չի փաստում Դուշանբեում ձեռք բերված վերելակային պայմանավորվածությունը`առաջնագծում լարվածությունը թուլացնելու մասին, ինչը մինչ օրս պահպանվում է`ի հեճուկս այն պայմանավորվածությունների, որոնք հայկական եւ ադրբեջանական կողմերի նախագահները ձեռք բերեցին 2016 թվականի քառօրյա պատերազմից հետո`Վիեննայում եւ Սանկտ-Պետերբուրգում`միջազգային միջնորդների ներկայությամբ, Արթուր Թովմասյանը պատասխանեց. «Արցախի հիմնահարցը, Ցեղասպանության հարցը, Հայ դատը, օրակարգային այնպիսի բարձր մակարդակի հարցեր են… վերելակային խոսակցությունները, օրինակ ես լուրջ չեմ ընդունում: Որ կրակոցները քչացել են, նորմալ է, նորմալ եմ նայում, որ բանակցային գործընթացը շարունակվելու է, չի մտել փակուղի, բայց կլինե՞ն բանակցություններ`նոր կասենք`կա՞ փոխվստահություն Նիկոլ Փաշինյանի եւ Իլհամ Ալիեւի միջեւ, թե`ոչ»:

Հետաքրքրվեցինք`իր կարծիքով այժմ ՀՀ եւ Ադրբեջանի արտգործնախարարների միջեւ բանակցություննե՞ր են ընթանում, թե՞ հանդիպումներ: Որ արտգործնախարարները պետք է հող նախապատրաստեն առաջնորդների հանդիպման համար, նաեւ սեղանին դնեն իրենց մոտեցումները`միանշանակ է. «Բայց ես հիմա չգիտեմ`մադրիդյա՞ն սկզբունքներն են սեղանին դրված, թե՞ կազանյան. ի՞նչ է դրված`ոչինչ պարզ չէ: Դա միայն առաջին դեմքերի հանդիպումից հետո ժողովրդի դատին կներկայացվի»:

«Նախարարները քննարկել են հարցերի լայն շրջանակ՝ կապված Լեռնային Ղարաբաղի հակամարտության հետ եւ համաձայնել, որ անհրաժեշտ է բնակչությանը խաղաղության նախապատրաստելուն ուղղված կոնկրետ միջոցառումներ ձեռնարկել»,- ասված է երկու նախարարների հանդիպումից հետո`ԵԱՀՄ Մինսկի խմբի համանախագահների տարածած հայտարարության մեջ: Արթուր Թովմասյանից հետաքրքրվեցինք`իր կարծիքով ի՞նչ խաղաղության նախապատրաստելու մասին է խոսքը: «Մինչեւ Ադրբեջանի դասագրքերի`ոչ միայն պատմության, այլ անգամ մաթեմատիկայի, երգի դասագրքերում հայը ներկայացված է որպես ոխերիմ թշնամի, ինչի՞ մասին է խոսքը: Պետք է վերլուծեն`1994 թվականի մայիսի 12-ի հրադադարից հետո Ադրբեջանն ի՞նչ հակահայկական քարոզչություն է տարել: Արցախի ժողովրդին խաղաղություն պետք չէ: Արցախի ժողովրդին արժանապատիվ խաղաղություն է պետք: Արցախի Սահմանադրությամբ Արցախի կազմը ներկայացված է եւ մեր իշխանությունն իր փաստացի իշխանությունն իրականացնում է ողջ տարածքով մեկ: Այդ սահմանները գծված են մեր զոհված ազատամարտիկների արյամբ. ի՞նչ եք կարծում, ի՞նչ անենք: Կա խաղաղություն, կա արժանապատիվ խաղաղություն. ես չգիտեմ`ո՞ր խաղաղության մասին են ասում համանախագահները: Մի բանում համոզված եղեք`ես Արցախի այն պատգամավորներից եմ, որոնք դուրս չեն եկել Արցախից: Ես մնացել եմ Արցախում: Ովքեր դուրս են եկել Արցախից`այդ հարցերը նրանց տվեք, միգուցե նրանք շրջան տվո՞ղ արցախցիներ են»:

Մեր զրուցակիցը նկատում է` աշխարհում կա մոտ երկու միլիոն արցախցի, որոնցից Արցախում 150 հազարն է բնակվում, մոտ 500-550 հազարը ՀՀ-ում է բնակվում, մոտ 600-ը`ՌԴ-ում, մոտ 650-ը`ԱՊՀ մյուս երկրներում եւ աշխարհով մեկ. «Արցախում ապրողներին ես ասում եմ արցախցիներ, մյուսներին`ղարաբաղցիներ: Արցախում բնակվող 150 հազարի մեջ հայրենասերներ չկան, բոլորը հայրենապաշտներ են: Հայրենասերներն այն արցախցիներն են, որոնք ապրում են Արցախի սահմաններից դուրս, բայց չեն մոռացել իրենց հայրենիքը`դա կլինի ներդրումների տեսքով, իրենց հարազատներին օգնելու, կամ իրենց պապերի-տատերի, ծնողների գերեզմաններին այցելելով»: Մեր զրուցակցին վրդովվեցնում է անտարբերությունը, նա դժգոհ է «Հայաստան» համահայկական հիմնադրամի մարաթոնին մասնակիցների թվից. «Հրեաներից մի բան պիտի՞ սովորենք, թե`ոչ»:

Ինչ վերաբերվում է Արցախի`բանակցությունների սեղան վերադառնալու հեռանկարներին, ինչի մասին քանիցս հայտարարել է ՀՀ վարչապետ Նիկոլ Փաշինյանը, Արթուր Թովմասյանն ասում է. «Արցախը բանակցային սեղանին պետք է վերադառնա որպես պատերազմող կողմ, ոչ թե որպես հակամարտող կողմ»: Նա փաստում է, որ թե 1992-94-թվականների, թե 2016 թվականի պատերազմը եղել է Ադրբեջանի եւ Արցախի միջեւ, Ադրբեջանի եւ Հայաստանի միջեւ հակամարտություն է`սահմաններում լարվածություն, Արծվաշենի խնդիրը եւ այլն, բայց ՀՀ-ի եւ Ադրբեջանի միջեւ պատերազմ երբեք չի եղել: 


     

Քաղաքական

Տնտեսական

Հասարակական

Ռազմական

Ամենադիտված

ամիս

շաբաթ

օր

Ջաբրայիլի հոսպիտալի բժիշկները բարդ վիրահատությամբ փրկել են 18-ամյա զինծառայողի կյանքը

Սահմանված անվանակարգերում հայտնի են բերքի տոնի հաղթողները

Արցախը երբևիցե ՀՀ մարզ չի լինելու. Վիտալի Բալասանյան

ԿՀՎ-ի (CIA) գաղտնազերծված հույժ գաղտնի զեկույցը Լեռնային Ղարաբաղի հակամարտության վերաբերյալ

Վերջին օրերի իրադարձությունները կարծես թե փաստում են, որ մոտենում ենք ատելության սահմանագծին. Արշավիր Ղարամյան

Ադրբեջանում ցածրակարգ ֆլեշմոբի կազմակերպիչները Արցախի սահմաններին մոտենալու հնարավորություն չունեն․ Դավիթ Բաբայան

Եթե Թուրքիային չկանգնեցնենք, կկրկնվի 1915 թ. Հայոց ցեղասպանությունը. Օսման Բայդեմիր

Գրիգորի Մարտիրոսյանը ներկայացրել է Ստեփանակերտի նորընտիր քաղաքապետին

Կայացել է «Վաղվա Արցախ» կուսակցության հիմնադիր համագումարը

Search