ԱՀ կրթության, գիտության և սպորտի նախարարության նախաձեռնությամբ այսօր Ստեփանակերտի մշակույթի և երիտասարդության պալատում տեղի է ունեցել ուսուցիչների մեծարման երեկո:
Ստեփանակերտում տեղի է ունեցել ուսուցիչների մեծարման երեկո (լուսանկարներ)
ՍՏԵՓԱՆԱԿԵՐՏ, հոկտեմբերի 8, ԱՐՑԱԽՊՐԵՍ:«Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել ԱՀ ԿԳՍ նախարար Նարինե Աղաբալյանը:
Նա ասել է, որ տոնական միջոցառումը նախատեսված էր կազմակերպել հոկտեմբերի 5-ին՝ ուսուցչի օրը: Ցավալիորեն հայազգի մեծանուն Շառլ Ազնավուրի մահվան պատճառով այն հետաձգվել է:
«Այսօր մեր երախտիքի խոսքն ենք հղում մեր ուսուցիչներին: Մարդկանց, որոնց դերն անգնահատելի է սերունդների կրթության ու դաստիարակության գործում, յուրաքանչյուր երեխայի բնատուր և մտավոր կարողությունները, շնորհը, տաղանդը բացահայտելու և զարգացնելու անհատականություն ձևավորելու մեջ: Լավագույն վկայությունն այն է, որ մեր ուսուցիչները կրթել են այնպիսի սերունդ, որոնք արցախյան պատերազմում հաղթանակ են կերտել, այսօր էլ նրանք պետականաշինության գործում իրենց ավանդն են բերում: Այսօր ուսուցչի դերը փոխվել է: Նա պետք է լինի աշակերտի կայացման ճանապարհի խորհրդատուն և օգնականը: Մենք պետք է նաև ստեղծենք այնպիսի պայմաններ, որ գյուղում ապրող աշակերտների թիվն ավելանա, և նրանք զրկված չլինեն որակյալ կրթություն ստանալուց: Պիտի կարողանանաք լրացուցիչ միջոցներ ներդնել ուսուցչի աշխատանքն ըստ արժանվույն գնահատելու և նրա հեղինակությունը բարձր պահելու համար: Կրթության ոլորտի խնդիրները միշտ էլ եղել են իշխանությունների ուշադրության կենտրոնում: Վերջին 7 տարիներին Արցախում շուրջ 100 դպրոց և նախադպրոցական հաստատություն է հիմքից կառուցվել կամ նորոգվել, հազարավոր երեխաների համար ապահովվել են ժամանակակից պայմաններ»,- մասնավորապես ասել է Ն. Աղաբալյանը:
Այս տարվանից մանկավարժների շարքը համալրած Ստեփանակերտի Անդրեյ Սախարովի անվան N 8 ավագ դպրոցի հայոց լեզվի և գրականության ուսուցչուհի Էմմա Պողոսյանն ասել է, որ Արցախում աշակերտների մեջ հայրենասիրություն դաստիարակելը ողջ մանկավարժների աշխատանքի հիմքն է:«Պետք է ունենաք դժվարությունները հաղթահարելու անսասան հաստատակամություն: Աշակերտների գիտակցությանը հասցնենք այն գաղափարը, որ կան վսեմ նպատակներ, որին պետք է ձգտեն հասնել»,-նշել է Է. Պողոսյանը:
Երեկոյին ելույթներով հանդես են եկել նաև Արցախի տարբեր շրջաններից ուսուցիչներ և աշակերտներ:
Միջոցառմանը երգերով, պարերով և ժողգործիքների կատարումներով նաև հանդես են եկել մշակութային կենտրոնների սաները և անհատ կատարողները:
Տոնական միջոցառմանը ԱՀ ԿԳՍ նախարարությունն Արցախի կրթության ոլորտում երկարամյա բեղմնավոր գործունեության և մեծ վաստակի համար մի շարք ուսուցիչների է հանձնել շնորհակալագրեր և դրամական պարգևներ, իսկ ներկաներին՝ ծաղիկներ:
Միջոցառմանը ներկա էին ԱՀ նախագահ Բակո Սահակյանը, ԱՀ Ազգային ժողովի նախագահ Աշոտ Ղուլյանը, ԱՀ պետնախարար Գրիգորի Մարտիրոսյանը, պաշտոնատար այլ անձինք, Արցախի տարբեր շրջանների թոշակառու և երիտասարդ ուսուցիչներ, «Դասավանդի՛ր, Հայաստան» կրթական հիմնադրամի Արցախում դասավանդող մանկավարժներ և այլք:
