Անասնապահության կանոնակարգման ուղղությամբ Թաղավարդում աշխատանքներ են իրականացվում
Մարտունու շրջանի Թաղավարդ համայնքում «Անասնաբուծության կանոնակարգում և արոտավայրերի կառավարում» ծրագրի շրջանակներում հուլիսի 29-ից մեկնարկել են գյուղի վարչական սահմաններում գտնվող արոտավայրերի մակերեսային բարելավման՝ քարերից ու թփուտներից մաքրման և արոտների ջրարբիացման աշխատանքները:
Անասնապահության կանոնակարգման ուղղությամբ Թաղավարդում աշխատանքներ են իրականացվում
ՍՏԵՓԱՆԱԿԵՐՏ, օգոստոսի 1, ԱՐՑԱԽՊՐԵՍ:Այս մասին «Արցախպրես»-ի թղթակցի հետ զրույցում ասել է ԱՀ գյուղատնտեսության նախարարության անասնաբուծության և անասնաբուժության վարչության պետ Նորայր Մուսայելյանը:
Նա նշել է, որ արոտավայրերի բարեկարգման աշխատանքների իրականացման համար ստեղծվել են երեք աշխատանքային խմբեր. այդ աշխատանքներին Թաղավարդի համայնքից մասնակցում է շուրջ 50 հոգի: Նրանք արոտավայրերի բարելավման համար 1 հա-ի դիմաց պետության կողմից վարձատրվում են 30 հազար դրամով: Իսկ համայնքի ջրարբիացման աշխատանքներն իրականացվում է «ՎարանդաՇին» ՓԲԸ կողմից:
Ն. Մուսայելյանի խոսքով՝ արոտավայրերի արդյունավետ շահագործումը և որակական հատկանիշների պարբերաբար բարելավումը կախված է այդ աշխատանքների օգտագործման և բարելավման ճիշտ պլանավորումից:
Ըստ մեր զրուցակցի՝ Թաղավարդի բնակչության հիմնական եկամտի աղբյուրը անասնաբուծությունն է: Համայնքում խոշոր եղջերավոր կենդանիների թիվը 660 է, մանր եղջերավոր կենդանիներինը՝ 576, խոզերինը՝ 330, իսկ թռչունների թիվը 5 576 է: Համայնքի վարչական սահմաններում գտնվող գյուղատնտեսական կենդանիների արածեցման համար նախատեսված ընդհանուր արոտների մակերեսը 330 հեկտար է:
«Արոտները գերծանրաբեռնված են: Չունենալով հերթափոխ արածեցման գործող մեխանիզմներ՝ տարիների ընթացքում բարձրարժեք կերաբույսերի տեսակները նվազել են, ինչպես նաև պակասել են ստացվող կերի քանակն ու որակը: Արոտավայրերի գերակշիռ մասը թփակալված է, իսկ որոշ մասերում թունավոր և կերակրման համար ոչ պիտանի բույսերն էլ կազմում են բուսածածկի մոտ 80 տոկոսը: Արոտավայրերում խմելու ջրի բացակայության պատճառով անասուները ստիպված են լինում ծարավը հագեցնելու համար հաղթահարել երկար տարածություններ, որը բացասաբար է ազդում կենդանիների մթերատվության վրա՝ 10-25 % նվազեցնելով կենդանիների կաթնատվությունը և 25-30 տոկոսով քաշաճը: Ծրագրի նպատակն է բացառել արգելված վայրերում կենդանիների հայտնվելու դեպքերը, ստեղծել նախադրյալներ համայնքում անասնաբուծության կանոնակարգման և արոտների կառավարման համար, ինչի շնորհիվ էլ առկա ռեսուրսների արդյունավետ օգտագործմամբ կբարձրացվի արոտների արդյունավետությունն ու կերային արժեքը՝ դրանով իսկ խթանելով անասնապահության արդյունավետությունը»,-ավելացրել է Ն. Մուսայելյանը:
Նշենք, որ ըստ ծրագրի, նախատեսվում է համայնքի տարածքում գտնվող շուրջ 330 հա տարածք կազմող արոտավայրերում աշխատանքներն ավարտին հասցնել մինչև տարեվերջ: