Գալիք տարում պահպանվելու է Արցախում կազմակերպվող փառատոնները:
Գալիք տարում կընդլայնվի Արցախում կազմակերպվող փառատոնների ցանկը. Ս. Շահվերդյան
ՍՏԵՓԱՆԱԿԵՐՏ, 15 դեկտեմբերի, ԱՐՑԱԽՊՐԵՍ: Այս մասին այսօր՝ դեկտեմբերի 15-ին կայացած տարեվերջյան մամուլի ասուլիսի ժամանակ ասել է ԱՀ մշակույթի, երիտասարդության և զբոսաշրջության հարցերի նախարար Սերգեյ Շահվերդյանը:
«Արցախպրես»-ի կողմից հնչեցված այն հարցին, թե արդյո՞ք ԱՀ մշակույթի, երիտասարդության և զբոսաշրջության հարցերի նախարարությունը նախատեսում է փառատոնների ցանկի ընդլայնում և զբոսաշրջության վարչության միացումը նախարարությանը ինչ-որ կերպ ազդելո՞ւ է փառատոնների կազմակերպմանը, Ս. Շահվերդյանը նշել է, որ տարիներ առաջ գինու փառատոնի կազմակերպման լիազորությունը տրված էր ԱՀ կառավարությանն առընթեր զբոսաշրջության վարչությանը, ապա միջոցառմամբ զբաղվել է էկոնոմիկայի նախարարությունը, իսկ ներկայումս՝ մշակույթի, երիտասարդության և զբոսաշրջության հարցերի նախարարությունը:
Ս. Շահվերդյանի խոսքով՝ փառատոնների կազմակերպումը նպատակ ունի տեղի արտադրանքը վաճառելու և զբոսաշրջիկների հոսքը մեծացնելու:
«Այդ նպատակներին ծառայում էր միայն արցախյան գինու փառատոնը, անցած տարի ունեցանք նաև օդային փառատոն և այս ուղղությամբ մենք կշարունակենք քայլեր ձեռնարկել»,- ասել է Ս. Շահվերդյանը՝ ընդգծելով, որ ցանկացած լիազորված մարմին իրավունք ունի կազմակերպել փառատոն:
