Այսօր՝ դեկտեմբերի 2-ին, Ստեփանակերտի Շառլ Ազնավուրի անվան մշակույթի կենտրոնում Արցախի պետական համալսարանի Պատմության և իրավագիտության ֆակուլտետի նախաձեռնությամբ կազմակերպվել է հուշ-երեկո՝ նվիրված Հայաստանի ազգային հերոս, Արցախի հերոս, լեգենդար զորավար Մոնթե Մելքոնյանի (Ավո)ծննդյան 65-ամյակին:
Ստեփանակերտում տեղի է ունեցել Մոնթե Մելքոնյանին (Ավո) նվիրված հուշ-երեկո
ՍՏԵՓԱՆԱԿԵՐՏ, 2 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ներկաները լռության րոպեով հարգանքի տուրք են մատուցել Արցախյան բոլոր պատերազմներում նահատակվածների հիշատակին:
«Որպես մայր Հայաստանի անբաժան մաս, Արցախի հայկականության պահպանման համար մղված պայքարը հայ ազգային-ազատագրական պայքարում կարևոր նշանակություն ունի: Այդ գիտակցումով հայ ժողովրդի բազմաթիվ զավակներ հերոսացան: Հայոց նվիրյալ գործիչների աստղաբույլում է նաև Մոնթե Մելքոնյանը: Նա մարմնացումն է անկեղծ մղումների, ազգային, բարոյական արժանիքների: Այսպիսի միջոցառումները շատ կարևոր են ռազմահայրենասիրական դաստիարակության, ուսանողներին հայրենասիրական ոգի ներշնչելու համար»,-մեզ հետ զրույցում ասել է ֆակուլտետի դեկան Արմինե Խաչատրյանը:
Միջոցառմանը ներկայացվել են Մոնթեի սխրանքները և ընդգծվել նրա կերպարը որպես հայրենասիրության, ազգապաշտության, նվիրվածության խորհրդանիշ:
Հուշ-երեկոյի ընթացքում համալսարանականները հանդես են եկել հայրենասիրական ստեղծագործությունների ասմունքով ու երաժշտական կատարումներով:
