Ընթացիկ տարում Հանրապետությունում աշնանացանի աշխատանքները մեկնարկել են հոկտեմբեր ամսվա առաջին տասնօրյակից, ընթանում են բնականոն հունով:
Աշնանացանը շարունակվում է բնականոն հունով. ոլորտի պատասխանատու
ՍՏԵՓԱՆԱԿԵՐՏ, 14 նոյեմբեր, ԱՐՑԱԽՊՐԵՍ:Այս մասին «Արցախպրես»-ի թղթակցի հետ զրույցում տեղեկացրել է Արցախի Հանրապետության գյուղատնտեսության նախարարության աշխատակազմի բուսաբուծության և բույսերի պաշտպանության վարչության պետ Արամ Բադալյանը:
«Այս տարվա բերքատվության ցուցանիշները բավականին բարձր են եղել։ Հողօգտագործողները դրա շնորհիվ առնվազն երկու, երեք տարի դեռ կարող են աշնանացան կատարել, գրագետ մշակության դեպքում ապահովվելով բավականին բարձր ցուցանիշներ: Աշնանացանի հիմնական մշակաբույսերը ցորենն ու գարին են, քիչ մաս է կազմում նաև տրիտիկալեն»,-հավելեց մեր զրուցակիցը։ Անդրադառնալով համապատասխան գյուղտեխնիկայի առկայության հարցին, Ա. Բադալյանը նշել է, որ աշնանացանը օպտիմալ ժամկետներում իրականացնելու համար շրջանում առկա են համապատասխան գյուղատնտեսական տեխնիկա և սարքավորումներ, սակայն աշխատանքները իրականացնելու համար պահանջվող ագրեգատների զգալի մասը մաշված է:
«Հորդորում եմ հողօգտագործողներին, ցանքի ժամկետները որոշելիս, հաշվի առնել, որ մինչև սառնամանիքների սկսվելը, բույսերը պետք է թփակալվեն:
Ուստի ցանքը պետք է կատարել կայուն ցրտերի վրա հասնելուց 55-60 օր առաջ՝ լեռնային և նախալեռնային շրջաներում օգոստոսի կամ մինչև սեպտեմբերի վերջին տասնօրյակում, իսկ հարթավայրային գոտում` նոյեմբերի վերջին տասնօրյակում»,- պարզաբանել է Արամ Բադալյանը։
