Հայաստանի ազգային պատկերասրահում պաստառների միջոցով արվեստասերներին ներկայացվեցին թանգարանների բացառիկ նմուշներ։
ՀՀ-ում ՌԴ հոգևոր մշակույթի օրերի բացումը մեկնարկել է պաստառների միջոցով թանգարանների բացառիկ նմուշների ցուցադրությամբ
ՍՏԵՓԱՆԱԿԵՐՏ, 6 հոկտեմբեր, ԱՐՑԱԽՊՐԵՍ-ԱՐՄԵՆՊՐԵՍ: Նմուշները ցուցադրվեցին Հայաստանի և Ռուսաստանի միջև դիվանագիտական հարաբերությունների հաստատման 30-ամյակին նվիրված հոկտեմբերի 5-7-ն անցկացվող «Հայաստանում Ռուսաստանի հոգևոր մշակույթի օրեր» ծրագրի շրջանակում։
Լուսանկարները՝ Հայկ Մանուկյանի
«Այսօրվա արագ փոփոխվող աշխարհում, որը լի է բազմաթիվ մարտահրավերներով, մշակութային և հոգևոր կապերը առանձնահատուկ դեր են խաղում։ Հայերին ու ռուսներին շատ բան է միավորում: Մեր ժողովուրդները հարգում ու կարևորում են ազգային արժեքները, փորձում են պահպանել ազգային ինքնությունը»,- նշեց ՀՀ-ում ՌԴ արտակարգ և լիազոր դեսպան Սերգեյ Կոպիրկինը։
ԿԳՄՍ փոխնախարար Ալֆրեդ Քոչարյանի խոսքով՝ սա լավ հարթակ է ծանոթանալու ռուսական թանգարաններում պահվող հայկական մշակութային ժառանգությանը, ինչպես նաև թանգարանագետների միջև փորձի փոխանակման լայն հնարավորություն։
«Այսօր, երբ դաժանաբար, նպատակաուղղված ոչնչացվում կամ յուրացվում են մշակութային կոթողները, ազգային ժառանգությունը, շատ կարևոր է դրա հանրայնացումն արվեստը սիրողների ու գնահատողների շրջանում: Նոր տեխնոլոգիաների միջոցով այսօր հնարավոր է առանց երկրից դուրս գալու, առցանց այցելել աշխարհի ցանկացած թանգարան, ինչը հրաշալի է»,- ասաց ՀՀ ԿԳՄՍ նախարարի տեղակալ Ալֆրեդ Քոչարյանը։
ՌԴ մշակույթի նախարարության ներկայացուցիչ Էդիտա Իսահակյանը նշեց, որ երկու երկրների թանգարանների միջև կայուն երկխոսությունը կարևոր նախադրյալ է մշակութային կապերի ամրապնդման համար:
«Մենք փորձել ենք այս ցուցադրությամբ ներկայացնել տարբեր ազգերի թանգարանային ժառանգությունը, որը պահվում է մեր երկրի թանգարաններում»,-ասաց նա։
Ծրագրի շրջանակում տեղի կունենա նաև թանգարանային ցուցադրություն «Ռուսաստանը թանգարանային երկիր» խորագրով, ինչպես նաև կլոր սեղան-քննարկում՝ «Թանգարանների ապրանքանիշերի խթանման ժամանակակից գործիքներ և տեխնոլոգիաներ» թեմայով:
Հայաստանի ազգային պատկերասրահում հոկտեմբերի 7-ին տեղի կունենա համաժողով՝ նվիրված Հայաստանի և Ռուսաստանի ընդհանուր հոգևոր ժառանգությանը, իսկ «Առնո Բաբաջանյան» համերգասրահում կբացվի «Հայաստան, Հայաստան» խորագրով ցուցահանդեսը. կներկայացվեն լուսանկարներ «Ռոսֆոտո» թանգարան-ցուցահանդեսային կենտրոնի հավաքածուից:
Հոկտեմբերի 7-ին՝ ժամը 19:00-ին, տեղի կունենա ծրագրի փակումը, որի ընթացքում Կոմիտասի անվան կամերային երաժշտության տանը Մոսկվայի Սինոդի երգչախումբը հանդես կգա համերգով:
Ռուսաստանյան պատվիրակության այցի շրջանակում կկազմակերպվեն նաև երկկողմ հանդիպումներ կինոոլորտի մասնագետների և արվեստի բուհերի ներկայացուցիչների միջև:
