Այսօր՝ հոկտեմբերի 6-ին, Ստեփանակերտի Շախմատի մարզադպրոցում մեկնարկել է Արցախի և ՀՀ դպրոցականների շախմատի 16-րդ օլիմպիադայի հանրապետական փուլը:
Մեկնարկել է Արցախի և ՀՀ դպրոցականների շախմատի 16-րդ օլիմպիադայի հանրապետական փուլը
ՍՏԵՓԱՆԱԿԵՐՏ, 6 հոկտեմբերի, ԱՐՑԱԽՊՐԵՍ։ «Արցախպրես»-ի թղթակցի հետ զրույցում ԱՀ ԿԳՄՍ նախարարության կրթության պետական տեսչության նախնական մասնագիտական, արհեստագործական և նախադպրոցական կրթության տեսչավորման բաժնի վարիչ, ավագ պետական տեսուչ, շախմատի գծով գլխավոր մասնագետ Բեհմուդ Մելքումյանը նշել է, որ դպրոցականների շախմատային մրցապայքարը կտևի երկու օր:
«Մասնակցում են քաղաքային և շրջանային փուլերում հաղթած թիմերը՝ Ստեփանակերտի, Մարտունու, Ասկերանի, Մարտակերտի և Շուշիի մինչև 14 տարեկան դպրոցականների ընդգրկմամբ: Յուրաքանչյուր թիմ բաղկացած է 4 մասնակցից: Լավագույն արդյունք ցուցաբերած թիմը կմասնակցի Հայաստանի Հանրապետությունում կայանալիք եզրափակիչ փուլին, որի հաղթողն էլ՝ Ռուսաստանի Դաշնությունում կայանալիք միջազգային մրցաշարին»,-նշել է Բ.Մելքումյանը:
Մրցույթի արդյունքները կամփոփվեն վաղը՝ հոկտեմբերի 7-ին:
Մրցանակային տեղեր գրաված թիմերը կստանան մեդալներ, պատվոգրեր և դրամական պարգևներ, իսկ հաղթողը նաև գավաթ:
