Պրահայում Եվրոպական քաղաքական համայնքի գագաթնաժողովի շրջանակում տեղի է ունեցել Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի հանդիպումը:
Քառակողմ բանակցություններից առաջ Պրահայում հանդիպել են Շառլ Միշելն ու Իլհամ Ալիևը
ՍՏԵՓԱՆԱԿԵՐՏ, 6 հոկտեմբեր, ԱՐՑԱԽՊՐԵՍ։ 1lurer.am-ի փոխանցմամբ, այս մասին Շառլ Միշելը գրառում է կատարել Twitter-ի իր միկրոբլոգում:
«Նյու Յորքում Նիկոլ Փաշինյանի հետ հանդիպումից հետո այսօր Պրահայում հանդիպել եմ Իլհամ Ալիևի հետ: Ավելի ուշ ես և Էմանուել Մակրոնը կհանդիպենք Հայաստանի վարչապետի և Ադրբեջանի նախագահի հետ՝ քննարկելու Հայաստան-Ադրբեջան հարաբերությունները և տարածաշրջանում կայուն խաղաղություն հաստատելու ջանքերը»,- գրել է Միշելը:
Լրատվամիջոցների տվյալով՝ հանդիպման ընթացքում կողմերը, մասնավորապես, ընդգծել են Հայաստանի և Ադրբեջանի միջև հարաբերությունների կարգավորմանն ուղղված Երևան-Բրյուսել-Բաքու ձևաչափով հանդիպումների կարևորությունը:
Իլհամ Ալիևը շնորհակալություն է հայտնել Շառլ Միշելին միջնորդական առաքելության համար։ Միշելը և Ալիևն անդրադարձել են նաև նոյեմբերին Բրյուսելում նախատեսված Փաշինյան-Միշել-Ալիև եռակողմ հանդիպման օրակարգին։
