Հոկտեմբերի 4-ին Ֆրանսիայի մայրաքաղաքից մեկնարկած՝ «Փարիզ- Ստեփանակերտ -Երևան» փառատոնը, երեկ և այսօր՝ հոկտեմբերի 6-ին, շարունակվել է Ստեփանակերտում, որի շրջանակներում տեղի են ունեցոլ ֆիլմերի ցուցադրություններ ու գրքերի քննարկումներ:
«Փարիզ- Ստեփանակերտ -Երևան» փառատոնի շրջանակներում Ստեփանակերտում կայացել են ֆիլմերի ցուցադրություն և գրքերի քննարկումներ
ՍՏԵՓԱՆԱԿԵՐՏ, 6 հոկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառման շրջանակներում Ստեփանակերտի «Վալլեքս Գարդեն» կինոդահլիճում ցուցադրվել են հայ և ֆրանսիացի կինոռեժիսորների ֆիլմեր:
Արցախի Հանրապետության ԿԳՄՍ նախարարության մշակույթի և երիտասարդության վարչության միջոցառումների կազմակերպման և կապերի բաժնի վարիչ Արուս Գասպարյանն ասել է, ներկայացված ֆիլմերը հիմնականում նախատեսված են 11 և բարձր տարիքային խմբերի համար:
«Մասնավորապես ներկայացվել են կինոռեժիսոր Նիկոլա Բարիի «Տիմպլեբախի երեխաները», Նորա Մարտիրոսյանի «Երբ որ քամին հանդարտվի» և Մարի Ամիգեի ու Վենսան Մյունիեի «Ձյան հովազը» ֆիլմերը»,-մանրամասնեց մեր զրուցակիցը:
«Տիմպելբախի երեխաները» երիտասարդական ֆիլմի գործողությունները տեղի են ունենում Տիմբելբախ փոքրիկ գյուղում, որտեղ շաբաթներ ի վեր, երեխաները շարունակում են իրենց կատակներն ու վեճերը: Համբերությունը հատած ծնողները որոշում են լքել գյուղը մեկ օրով, սակայն նախատեսածին հակառակ, հետդարձի ճանապարհին նրանք գերեվարվում են զինվորների կողմից:
«Ձյան հովազը» 2022թ. փետրվարի 25-ին ֆիլմը Սեզար մրցանակ է ստացել որպես լավագույն փաստավավերագրական ֆիլմ: Տիբեթական բարձր սարահարթի սրտում լուսանկարիչ Վենսան Մյունիեն գրող Սիլվեն Տեսսոնին իր հետ տարել է ձնահովազ որոնելու, նրան հաղորդակից դարձնելով դարան մտնելու նուրբ արվեստին, հետքերի ընթերցման և անհրաժեշտ համբերության կենդանիներին հետապնդելու հմտություններին: Անցնելով գագաթները, բնակեցված անտեսանելի էակներով, երկու տղամարդիկ երկխոսություն են հյուսում և տոնում աշխարհի գեղեցկությունը:
Կինոռեժիսոր Նորա Մարտիրոսյանի «Երբ որ քամին հանդարտվի» ֆրանս-հայկական համատեղ արտադրության ֆիլմ է՝ նկարահանված Արցախում: Ֆիլմը ստացել է 4 Սեզար մրցանակ՝ «Լավագույն դերասան», «Լավագույն սցենար», «Լավագույն բեմադրում», «Լավագույն ֆիլմ» անվանակարգերում:
Ըստ սցենարի՝ միջազգային աուդիտոր Ալենը մեկնում է Արցախ օդանավակայանի բացման հնարավորությունը գնահատելու նպատակով: Առնչվելով տեղի բնակիչների և մի խորհրդավոր երեխայի հետ՝ Ալենը բացահայտում է նոր աշխարհ և ռիսկի է ենթարկում ամեն ինչ՝ հանուն ամեն ինչի: Փառատոնի շրջանակներում տեղի են ունեցել նաև Սիլվեն Տեսսոնի և Վալերի Թորանյանի գրքերի քննարկումները՝ Ստեփանակերտի «Պոլ էլյուարի տուն» ֆրանկոֆոնիայի կենտրոնում:
«Համապատասխան գրականությունը՝ ֆրանսերեն և հայերեն տարբերակներով, նախապես փոխանցել էինք ուսանողներին:
Գրքերի բովանդակությանը ծանոթանալուց հետո, հեռավար ձևաչափով ընթերցողների և հեղինակների մասնակցությամբ կազմակերպվել է քննարկում» ,- մանրամասնեց Ա. Գասպարյանը՝ հավելելով, որ ուսանողները լսել են գրողներին, ովքեր ներկայացրել են իրենց գրքերը, ապա հարցուպատասխանով քննարկել դրանք:
Փառատոնը կեզրափակվի այսօր: