Այսօր՝ հոկտեմբերի 5-ին, Մարտունու շրջանի Ննգի համայնքի միջնակարգ դպրոցում տեղի է ունեցել միջոցառում՝ նվիրված Ուսուցչի օրվան:
Ննգի համայնքի դպրոցում Ուսուցչի օրվա առթիվ շնորհակալագրեր են հանձնել թոշակառու մանկավարժներին
ՍՏԵՓԱՆԱԿԵՐՏ, 5 հոկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը հրավիրվել են նաև Ննգի համայնքի դպրոցի թոշակառու ուսուցիչները:
Մեզ հետ զրույցում տնօրեն Էլեոնորա Քամալյանը կարևորել է երկրի համար գիտակից և խելացի քաղաքացիներ կրթելու առաքելությունը, որն անհրաժեշտություն է հատկապես մարտահրավերներով լեցուն այս ժամակաշրջանում:
«ՈՒսուցիչը պարտավոր է կրթել մի սերունդ , որը կհաղթի բոլոր բնագավառներում, սերունդ, որ վաղն իր ուսերին կրելու է բոլոր դժվարությունները հաղթահարելու պարտականությունը»,- շեշտեց Է. Քամալյանը:
Գյուղի դպրոցի ռուսաց լեզվի նախկին ուսուցչուհի Նուրվարդ Դանիելյանը 40-ամյա մանկավարժական ուղի է անցել:
«Իմ հարազատ տունն է այս կրթօջախը, որտեղ սովորել են իմ երեխաները, և որին ես կապված եմ ամուր թելերով: Ես շնորհակալ եմ Աստծուց, որ բախտ է վիճակվել ուսուցիչ լինել, շփվել ՝ երեխաների հետ և երկար տարներ երիտասարդ զգալ ինձ»,-ասում է վաստակաշատ մանկավարժը:
Այնուհետև ուսուցիչներին շնորհավորել են աշակերտները, ովքեր հանդես են եկել ասմունքով, երգ ու պարով:
Միջոցառման վերջում դպրոցի կողմից շնորհակալագրեր են հանձնվել թոշակառու ուսուցիչներին:
