Արցախյան 44-օրյա պատերազմի ընթացքում նահատակվել է Արցախի հանրակրթական ուսումնական հաստատությունների 24 աշխատակից, այդ թվում՝ 14 մանկավարժ:
Հանուն հայրենիքի նահատակված ուսուցիչները բացառիկ անցկացրին իրենց վերջին դասը
ՍՏԵՓԱՆԱԿԵՐՏ, 5 հոկտեմբերի, ԱՐՑԱԽՊՐԵՍ: Այս մասին «Արցախպրես»-ի թղթակցի զրուցում ասել է ԱՀ ԿԳՄՍ նախարարի խորհրդական Աիդա Գյանջումյանը:
«Պատերազմական օրերին, հայրենիքի պաշպանությանը զինվորագրված մանկավարժներից 14-ը դարձավ հավերժի ճամփորդ: Ուսուցիչներից 1-ը գերեվարվել է թշնամու կողմից, 4-ն անհայտ կորած են համարվում, իսկ կրթության համակարգի 24 աշխատող տարբեր աստիճանի վիրավորում է ստացել: Պատերազմին մասնակցություն ունեցան նաև սպորտի ոլորտի ներկայացուցիչներ, որոնցից մարտի դաշտում անմահացավ 1 մարզիչ, իսկ 2-ը վիրավորվեց, զոհվեց 40 մարզիկ, վիրավորում ստացան 37-ը, անհայտ կորած է համարվում 8 մարզիկ: Նրանք միայն ֆիզիկապես մեզ հետ չեն, միշտ ներկա են մեր մեր հոգում ու պատմություններում: Ուսուցիչներն իրենց առաքելությունը միշտ էլ համարել են նոր սերնդի դաստիարակությունը, քանի որ այդպիսով ապահովում ենք մեր երկրի ապագան: Նրանց այսօրվա աշխատանքից է կախված մեր երկրի վաղվա օրը: Եթե ուսուցիչը աշակերտին պատմում է մեր նախնիների հերոսությունների մասին, իսկ երբ գալիս է հայրենիքի լինել չլինելու պահն ու անձամբ հերոսության ու հայրենավիրումի օրինակ չի հանդիսանում, նշանակում է այն ամենն ինչ ասվել է կմնա միայն որպես խոսք: Մեր ուսուցիչներն իրենց վերջին դասը, իրոք, բացառիկ անցկացրին: Ուղիղ նայելով մահվան աչքերին և գիտակցելով, որ թիկունքում իրենց մայրն ու քույրն են, նրանք առաջ գնացին, իրենց կյանքի գնով ապահովելով հայրենիքի գոյությունը»,- ասել է Ա. Գյանջումյանը:
