Երիտասարդ գյուղատնտես Արեն Խաչատրյանը, Արցախյան երրորդ պատերազմից հետո էլ շարունակում է այգեգործությամբ է զբաղվել Ասկերանի շրջանի Խրամորթ գյուղում, որը հայտնի է խաղողի ու նռան մշակությամբ:
Երիտասարդ արցախցին շարունակում է մշակել սահման դարձած իր այգին՝ սերնդեսերունդ փոխանցելու համոզմունքով
ՍՏԵՓԱՆԱԿԵՐՏ, 1 հոկտեմբերի, ԱՐՑԱԽՊՐԵՍ: «Արցախպրես»-ի թղթակցի հետ զրույցում Արեն Խաչատրյանը նախ նշեց, որ ավարտել է Հայաստանի Ազգային ագրարային համալսարանի Ստեփանակերտի մասնաճյուղի խմորման արտադրության և գինեգործության բաժինը:
Տարիներ շարունակ նա զբաղվում է այգեգործությամբ՝ հայրենի Խրամորթի տարածքում: Այգուց ստացված խաղողի և նռան բերքն օգտագործում է գինի պատրաստելու համար, մի մասն էլ իրացնում է:
«Պատերազմի հետևանքով այգու մեծ մասը մնաց թշնամու հսկողության տակ գտնվող տարածքում, ինչը, սակայն, պատճառ չդարձավ հուսահատվելու համար. շարունակում ենք մշակել մնացածը: Ներկայումս պատրաստվում ենք նռան բերքահավաքին, իսկ խաղողինն արդեն ավարտել ենք: Չնայած տարածքը թշնամու դիտակետում է, բայց ուշադրություն չենք դարձնում, շարունակում ենք մշակել մեր հողը, այգին, որպեսզի հակառակորդն էլ տեսնի, որ մենք չենք ընկճվում, շեն ենք պահում Արցախ աշխարհը»,- ասել է Ա. Խաչատրյանը:
Անդրադառնալով այգեգործությամբ զբաղվելու մտահղացման նախապատմությանը, նա վերհիշեց, որ 10 տարի առաջ հայրը հիմնել է «Թոռնիկների այգի»՝ տարբեր տեսակի պտղատու ծառերով:
Ներկայում ինքն է շարունակում հոր գործը, ընդլայնելով այգին՝ սերնդեսերունդ փոխանցելու համոզմունքով՝ անկախ թշնամու սադրանքներից:
Երիտասարդ այգեգործի խոսքով՝ իր հաջողության գրավականն առաջին հերթին աշխատասիրություն է, սերը հողի նկատմամբ: Գյուղատնտեսական աշխատանքներում ավելի հմտանալու համար նա շարունակում է սովորել հողի լեզուն ու ծառի մշակման նրբությունները, մասնակցելով վերապատրաստման դասընթացների, որոնցից ստացած գիտելիքներն կիրառում է գործնականում: