Այսօր՝ սեպտեմբերի 26-ին, Ստեփանակերտի Կոմիտասի անվան երաժշտական դպրոցում կայացել է Վարդապետի 153-ամյակին նվիրված միջոցառում:
Ստեփանակերտում Կոմիտասի ծննդյան 153-ամյակին նվիրված երեկո է կազմակերպվել
ՍՏԵՓԱՆԱԿԵՐՏ, 26 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ինչպես նշել են կազմակերպիչները, միջոցառումն առիթ էր վերարժևորելու Կոմիտասին, ևս մեկ անգամ ուկնդրելու նրա ստեղծագործությունները:
Կոմիտասի անվ. երաժշտական դպրոցի տնօրեն Զարինե Բաբայանի խոսքով՝ Վարդապետի ծննդյան օրվան նվիրված միջոցառումն ավանդական բնույթ է կրում և կազմակերպվում է ամեն տարի:
«Ազգը մեծ է իր մեծերով: Այո, մենք շատ հանճարներ ունենք, որոնց անունները ոսկե տառերով են գրվել պատմության էջերում. Կոմիտաս, Արամ Խաչատրյան, Առնո Բաբաջանյան, Սևակ: Կոմիտասն ապացուցեց աշխարհին, որ հայն ունի իր երգն ու երաժշտությունը: Մենք պետք է շարունակենք պահել, պահպանել ու կերտել մեր մշակույթը՝ ապրելով ու արարելով հայրենիքում անկախ բոլոր դժվարություններից»,-նշեց Զ.Բաբայանը:
Միջոցառմանը երաժշտական դպրոցի սաները ներկայացրել են Կոմիտասի կենսագրությունն ու ստեղծագործական ուղին, ասմունքել ու երգել նրա ստեղծագործություններից:
