Ստեփանակերտում դիմավորել են ըմբշամարտի Եվրոպայի առաջնության արցախցի փոխչեմպիոնին
Արցախցի ըմբշամարտիկ Հայկ Ավանեսյանը մրցանակային երկրորդ տեղն է գրավել հուլիսի 16-19-ը Խորվաթիայի մայրաքաղաք Զագրեբում կայացած Մ15 տարեկանների Եվրոպայի առաջնությունում՝ նվաճելով արծաթե մեդալ: Այսօր՝ հուլիսի 21-ին, Ստեփանակերտի «Մենք ենք, մեր սարերը» հուշակոթողի մոտ ԱՀ ԿԳՄՍ փոխնախարար Աշոտ Դանիելյանը, մի խումբ մարզասերներ դիմավորել են Եվրոպայի ըմբշամարտի առաջնության արցախցի փոխչեմպիոնին և նրա մարզիչ Արմեն Մուրադյանին:
Ստեփանակերտում դիմավորել են ըմբշամարտի Եվրոպայի առաջնության արցախցի փոխչեմպիոնին
ՍՏԵՓԱՆԱԿԵՐՏ, 21 հուլիսի, ԱՐՑԱԽՊՐԵՍ: «Արցախպրես»-ի թղթակցի հետ զրույցում՝ ԱՀ ԿԳՄՍՆ սպորտի վարչության պետ Դանիել Մկրտչյանը նշել է, որ դեռահասների ըմբշամարտի Եվրոպայի առաջնության այս արծաթե մեդալն ըմբշամարտ մարզաձևից առաջինն է Արցախի Հանրապետության մարզական պատմության մեջ:
Մարզիչ Արմեն Մուրադյանի խոսքով՝ առաջնությանը յուրաքանչյուր քաշային կարգում մասնակցում էր առնվազն 30 մարզիկ:
«Մեր ըմբիշը(57կգ) չորս գոտեմարտ է անցկացրել: Հատկանշական է Ֆրանսիայի ներկայացուցչի հետ հանդիպումը կիսաեզրափակչում, երբ Հայկը 7:1 հաշվով գրեթե պարտվում էր, սակայն կամային ուժ դրսևորելով, վերջին 30 վայրկյանում նա 9:7 հաշվով հաղթեց մրցակցին»,-իր հիացմունքն արտահայտելով, մանրամասնել է արցախցի մարզիչը՝ հավելելով, որ առաջին անգամ են մասնակցել Եվրոպայի ազատ ոճի ըմշամարտի առաջնությանը:
Արմեն Մուրադյանը շնորհակալություն է հայտնել Հայաստանի հավաքականի մարզչին և արցախցի գործընկերներին՝ Հայկ Ավանեսյանի նվաճումը համարելով բոլորի համատեղ աշխատանքի արդյունքը:
Ըմբշամարտիկ Հայկ Ավանեսյանը պատմեց, որ մրցագորգում հաղթել է Իսրայելի, Լատվիայի և Ֆրանսիայի ներկայացուցիչներին և զիջել միայն ուկրաինացի մրցակցին՝ արդեն եզրափակչում:
«Գրեթե 9 տարի է, որ ազատ ոճի ըմբշամարտով եմ մարզվում: Միշտ երազել եմ մասնակցել Եվրոպայի ու աշխարհի առաջնություններին: Այս ձեռքբերումն իմ մեծ երազանքի մի փոքր մասնիկն է, իսկ մեծ երազանքս Օլիմպիական խաղերին մասնակցելն ու հաղթելն է»,-ասել է Եվրոպայի առաջնության արծաթե մեդալակիրը: