Նախօրեին Ստեփանակերտում կայացել է Համազգային հայ կրթական և մշակութային միության Արցախի գրասենյակի կողմից կյանքի կոչված «Ապրելու ձայնը» նախաձեռնության հանդիսավոր փակման արարողությունը:
Ստեփանակերտում տեղի է ունեցել «Ապրելու ձայնը» նախագծի փակման արարողությունը
ՍՏԵՓԱՆԱԿԵՐՏ, 2 հուլիսի, ԱՐՑԱԽՊՐԵՍ: «Արցախպրես»-ի թղթակցի հետ զրույցում Համազգային հայ կրթական և մշակութային միության Արցախի գրասենյակի տնօրեն Հերմինե Ավագյանն ասել է, որ նախաձեռնության նպատակն էր հետպատերազմական Արցախում հնչեցնել «Ապրելու ձայնը» գրականության և մշակույթի լեզվով:
«Ես ուզում եմ, որ «Ապրելու ձայնը» հետպատերազմյան Արցախում դառնա լավագույն ստեղծագործություններից մեկը, որը կթարգմանվի տարբեր լեզուներով, և մեր մշակույթի ու գրականության արձագանքը լսելի լինի աշխարհի տարբեր անկյուններում: Հավատում եմ, որ Ապրելու ձայնի կանչը դեռ շատ-շատ հեռավոր գյուղեր է հասնելու մեր մի բուռ, բայց նշխար դարձած Արցախում»,-հավելել է մեր զրուցակիցը:
«Ապրելու ձայնը» նախագծի հեղինակ, արցախցի երիտասարդ բանաստեղծ Սերգեյ Սաֆարյանը նշել է, որ ամիսներ առաջ է նախաձեռնության համար առաջարկություն ներկայացրել Համազգային հայ կրթական և մշակութային միությանը։ Կառույցի Արցախի գրասենյակը հավանության է արժանացրել, որի արդյունքը յոթօրյա գրականա-մշակութային միջոցառումներն էին Հանրապետության մի շարք բնակավայրերում։
«Հետպատերազմյան Արցախում մշակութային և, հատկապես, գրական կյանքի ակտիվացման լուրջ խնդիր կա:
Եվ ես հենց այդ առաջարկությամբ հանդես եկա, որպեսզի կարողանանք աշխարհին ցույց տալ, որ Արցախում մարդիկ ապրում են, և, ապրելուն զուգահեռ, նաև մշակույթ են կերտում, ստեղծագործում են: Արցախում կան լավ ստեղծագործողներ, լավ պոետներ, և ոչ ոք չի կարող բացառել,որ հենց Արցախից ի հայտ գալու 21-րդ դարի համաշխարհային որևէ մեծություն»,- մանրամասնել է Ս. Սաֆարյանը՝ համոզմունք հայտնելով, որ միջոցառումների շարքը հաջողվել է, և նախագիծն ամենամյա բնույթ կստանա։
« «Ապրելու ձայնը» եկել է ու դեռ կգա՝ մշակույթով ու գրականությամբ` ի լուր աշխարհի ասելու,որ արցախցին ապրում է Արցախում և նրա ձայնը միշտ հնչելու է աշխարհի տարբեր հարթակներում»,-շեշտեց երիտասարդ բանաստեղծը:
ԱՀ ԿԳՄՍ նախարար Անահիտ Հակոբյանը մեզ հետ զրույցում կարևորել է նման միջոցառումները՝ նշելով, որ մշակույթն Արցախի հարատևման գրավականներից է։
Մշակութային նախագծի փակման արարողությանը տեղի ունեցավ յոթօրյա միջոցառումների շրջանակում կազմակերպված գրական- ստեղծագործական մրցույթի մասնակիցների պարգևատրումը։
Համազգային հայ կրթական և մշակութային միության Արցախի գրասենյակի կողմից շնորհակալագրեր են ստացել արցախյան այն լրատվամիջոցները, որոնք այս ընթացքում ակտիվ լուսաբանել են միջոցառումները։
«Արցախպրես» լրատվական գործակալությունը ևս արժանացավ շնորհակալագրի։
«Ապրելու ձայնը» գրական-մշակութային փառատոնն ամփոփվել է երգչուհի Շուշան Պետրոսյանի մենահամերգով:
