Ընթացիկ տարվա հուլիսի 11-13-ը Ստեփանակերտի մանկապատանեկան մարզադպրոցի քիք բոքսինգի լավագույն մարզիկները կմասնակցեն Երևանում կայանալիք միջազգային առաջնությանը՝ 5 պետության ներկայացուցիչների ընդգրկմամբ:
Արցախցի մարզիկները կմասնակցեն քիքբոքսինգի միջազգային առաջնության
ՍՏԵՓԱՆԱԿԵՐՏ, 1 հուլիսի, ԱՐՑԱԽՊՐԵՍ: «Արցախպրես»-ի թղթակցի հետ զրույցում տեղեկացրել է Արցախի քիքբոքսինգի ֆեդերացիայի գլխավոր մարզիչ Արմեն Ղահրամանյանը:
Նրա խոսքով՝ Երևանում նախատեսվող առաջնությանը կմասնակցեն օրերս Ստեփանակերտի մանկապատանեկան մարզադպրոցի կողմից կազմակերպված քիքբոքսինգի բաց առաջնությունում լավագույն արդյունքներ ցուցաբերած մարզիկներ:
«Ստեփանակերտի Վիտալի Ջհանգիրյանի անվան համար 11 ավագ դպրոցի մարզադահլիճում կայացած առաջնությանը տարբեր քաշային կարգերում և տարիքային խմբերում մասնակցել էր 80 մարզիկ, այդ թվում` Սյունիքի մարզի Կապան քաղաքի մարզադպրոցի 10 հոգանոց խումբը՝ ՀՀ վաստակավոր մարզիչ, Սյունիքի մարզի քիքբոքսինգի ֆեդերացիայի նախագահ Արա Սարգսյանի գլխավորությամբ: Նրանց մասնակցությունն ապահովվել էր ՀՀ Ազգային քիքբոքսինգի ֆեդերացիայի նախագահ Գառնիկ Հայրապետյանի աջակցությամբ»,-մանրամասնեց Արմեն Ղահրամանյանը՝ հավելելով, որ Ստեփանակերտում բաց առաջնության կազմակերպմանն էլ աջակցել է Ստեփանակերտի քաղաքապետ Արցախի քիքբոքսինգի ֆեդերացիայի նախագահ Դավիթ Սարգսյանը:
Գնահատելով արդյունքները, քիքբոքսինգի գլխավոր մարզիչը բարձր է գնահատել արցախցի մարզիկների պատրաստվածությունն ու ներուժը՝ համոզմունք հայտնելով , որ նրանք պատվավոր հորիզոնականներ կզբաղեցնեն առաջիկա մրցաշարում:
