Այսօր` մայիսի 21-ին, Ստեփանակերտի մշակույթի և երիտասարդության պալատում կայացել է Հայաստանի հանրային ռադիոընկերության Արամ Մերանգուլյանի անվան ժողովրդական գործիքների վաստակավոր անսամբլի համերգը:
Ստեփանակերտում կայացել է Արամ Մերանգուլյանի անվան ժողգործիքների վաստակավոր անսամբլի համերգը
ՍՏԵՓԱՆԱԿԵՐՏ, 21 մայիսի, ԱՐՑԱԽՊՐԵՍ։ «Արցախպրես»-ի թղթակցի հետ զրույցում Հայաստանի Հանրային ռադիոընկերության տնօրեն Գարեգին Խումարյանը նշեց, որ նման նախաձեռնությամբ առաջին անգամ են Արցախում։
«Այստեղ է ժողովրդական գործիքների Արամ Մերանգուլյանի անվան վաստակավոր անսամբլը։ Դա Հայաստանի հանրային ռադիոյի 4 անսամբլներից մեկն է: Կոլեկտիվը ժողովրդական ստեղծագործություններ է ներկայացնում: Ծրագրում ընդգրկված է 18 տրեկ»,- տեղեկացրեց Գ. Խումարյանը:
Հանրային ռադիոյի հաղորդավար Տիգրան Հարությունյանի խոսքով` այս այցն Արցախ տարբերվում է նախորդներից։
«Բազմիցս եղել եմ Արցախում, բայց այս այցս պարզապես տարբերվում էր մյուսներից` էմոցիոնալ տեսանկյունից: Մի քանի օր է` շրջում եմ Ստեփանակերտում, նկատում եմ, որ մարդկանց դեմքին ժպիտ է հայտնվել։ Այդ փաստն ինձ շատ է ուրախացնում»,-մեզ հետ զրույցում կարեւորեց Հանրային ռադիոյի հաղորդավար Տիգրան Հարությունյանը:
ԱՀ ԿԳՄՍ նախարար Անահիտ Հակոբյանի խոսքով` տեղական ժամանակ է` Արցախում նման միջոցառումներ չեն կազմակերպվում։
«Ես մտածում եմ, որ ժամանակն է վերադառնալ մեր բարի ավանդույթներին։ Դրանք ժողովրդին ապրեցնելու ուժ ունեն»,-նշել է ԿԳՄՍ նախարարը:
Նշենք, որ Արամ Մերանգուլյանի անվան ժողովրդական գործիքների անսամբլը կազմավորվել է 1926 թվականին, Երևանում` որպես ռադիոյի ժողգործիքների նվագախումբ: Առաջին գեղարվեստական ղեկավարն է եղել կոմպոզիտոր Արամ Մերանգուլյանը, այնուհետև խումբը ղեկավարել են կոմպոզիտոր Ստեփան Ջերմաշյանը, Արմեն Մանդակունյանը և Մանվել Բեգլարյանը: 1996 թվականից անսամբլը ղեկավարում է Հայաստանի ժողովրդական արտիստ Ռուբեն Մաթևոսյանը:
