Այսօր՝ ապրիլի 25-ին, Ստեփանակերտի քաղաքապետարանի նախաձեռնությամբ մայրաքաղաքի Խաչատուր Աբովյանի անվան համար 1 հիմնական դպրոցում անց է կացվել հրաձգության մրցույթի քաղաքային փուլը:
Մայրաքաղաքի դպրոցականների միջև հրաձգության մրցույթ է անցկացվել
ՍՏԵՓԱՆԱԿԵՐՏ 25 ապրիլի, ԱՐՑԱԽՊՐԵՍ։ «Արցախպրես»-ի թղթակցի հետ զրույցում գլխավոր մրցավար Սվետլաննա Ֆիրյանը նշել է, որ մրցույթին մասնակցում են մայրաքաղաքի տասներեք հանրակրթական դպրոցներ:
«Մրցույթին մասնակցում են հանրակրթական դպրոցների 8-12-րդ դասարանների աշակերտները` ընդհանուր երեսուն մասնակից:
Սկզբնական փուլում արդյունքները գոհացուցիչ են, 1-ին, 2-րդ դպրոցների մասնակից աղջիկները շատ բարձր արդյունքներ են գրանցել»,-ասել է Ս. Ֆիրյանը՝ տեղեկացնելով, որ մրցույթի ավարտից հետո լավագույն արդյունք գրանցած հինգ տղա ու հինգ աղջիկ կմասնակցեն մայիսի 13-14-ը կայանալիք մրցույթի հանրապետական փուլին:
Մայրաքաղաքի 1-ին հիմնական դպրոցի 9-րդ դասարանի աշակերտուհի Օլեսյա Ավագյանի խոսքով` բազմիցս մասնակցել է հրաձգության մրցույթի և առաջնակարգ տեղեր գրավել:
«Պարբերաբար մասնակցում եմ նմանատիպ մրցույթների ու մեծ սեր ունեմ հրաձգության հանդեպ: Կախված զենքի տեսակից՝ վաստակած միավորներս տարբերվում են մեկը մյուսից, բայց վերջնական արդյունքները միշտ էլ գոհացուցիչ են լինում»,-նշել է աշակերտուհին։
