Մարտակերտի մանկապատանեկան ստեղծագործական կենտրոնը գործում է 1995 թվականից և այս ընթացքում անցել է զարգացման ուրույն ուղի:
Մարտակերտի մանկապատանեկան ստեղծագործական կենտրոնը շարունակում է ակտիվ գործունեություն իրականացնել. տնօրեն
ՍՏԵՓԱՆԱԿԵՐՏ, հունվարի 27, ԱՐՑԱԽՊՐԵՍ։ 2021 թվականի ընթացքում կենտրոնի իրականացրած աշխատանքների, առկա խնդիրների ու առաջիկայում նախատեսվող ծրագրերի մասին «Արցախպրես»-ի թղթակիցը զրուցել է տնօրեն Ռիմա Իզմայիլյանի հետ:
«Կենտրոնում գործում է 35 խմբակ՝ նկարչության,գորգագործության,կարպետագործության, ասեղնագործության,հելյունագործության, երգի, պարի, ասմունքի, գոբելենի,ձեռագործ արհեստի, թատերական, կար ու ձևի, հագուստի մոդելավորման և այլն: Ունենք շուրջ 405 սան` ինչպես քաղաք Մարտակերտից, այնպես էլ՝ շրջանի գյուղերից: Կենտրոնը համալրված է անհրաժեշտ գույքով, և 2021թվականի ընթացքում կյանքի ենք կոչել բազմաթիվ ծրագրեր, որոնց շարքում կառանձնացնեի Հովհաննես Թումանյանի գրական գործունեությունը ներկայացնող, «Մայրենիի տոն», «Մայրության և գեղեցկության տոն» խորագրերով հետաքրքիր ու բովանդակալից միջոցառումները, Եղեռնի զոհերի, Արցախի հերոս Դավիթ Ղազարյանի հիշատակին նվիրված հուշ-ցերեկույթները: Կազմակերպել ենք նաև միջոցառումներ` նվիրված Արցախյան պատերազմին, Երեխաների պաշտպանության միջազգային օրվան, անց ենք կացրել տարեվերջյան հաշվետու միջոցառում, նաև ցուցահանդես՝ «Խաղաղության գույներ» խորագրով»,-ներկայացրել է Ռ. Իզմայիլյանը:
Մեր զրուցակցի խոսքով՝ ծրագրերն ու անելիքները շատ են, սակայն, համաճարակային իրավիճակով պայմանավորված, նախատեսված ծրագրերն իրագործելը հաճախ անհնարին է դառնում. իրադրության կայունացմանը զուգահեռ` կենտրոնը կսկսի ավելի ակտիվ գործունեություն իրականացնել: Կենտրոնի տնօրենը նշեց, որ կրթօջախը «Հայրենիք» միության ֆինանսավորմամբ 2018 թվականին հիմնանորոգվել է։ Նա իր երախտագիտությունը հայտնեց միությանը, քանի որ կառույցի նախաձեռնության շնորհիվ կարողանում են կենտրոնի սաների մեջ ձևավորել գեղագիտական ճաշակ՝ սերմանելով սեր արվեստի և մշակութային արժեքների նկատմամբ:
